Jess G. Berthelsen: Sulisussanik amigaateqarneq nunamut tamarmut ajorsarneruvoq
Jess. G Berthelsenip uparuarpaa, ilumuunngimmat oqartarneq kalaallit suliffimminnik paarsisinnaanngitsut. Taammaattoq misseratiginngilaa suliffeqarfiit ilaat ajornartorsiuteqarmata, ilaatigut aalisakkanik suliffeqarfissuit.
- Tamanna paasisariaqalerparput. SIK-uup kisimi suliassaq kivissinnaanngilaa. Kikkut tamarmik taanna ajornartorsiut suleqatigiissutigisariaqarpaat.
Innersuussutigaa, Royal Greenlandip kiniiserinik 30-inik sulisussanik tikisitsiniarnera Maniitsumut, Uummannamut aammalu Qasigiannguanut, sumiiffinni sulisussanik pissarsisinnaannginnanik. Massa Tunumi kujataanilu suliffissaaleqisut amerlagaluaqisut.
- Immitsinnut qiviartariaqalerpugut. Siulivut piniagassatik malillugit nuttartuusimapput. Piffissanngorpoq sumiiffinniit nuussinnaaneq, suliffissalimmut. Tamannalu iluatsissappat inissat meeqqanullu paaqqinnitarfiit piareersimasariaqarput.
- Inuiaqatigiit tamarmiusut ajorsarneraat. Nunatsinni suliffissaaleqisut amerlapput taamaakkaluartoq sumiiffiinni sulisussaaleqisoqarpoq, taamaattumik inuiaqatigiittut ajorsarnertut taaneqarsinnaavoq.