Sulisunik amigateqarneq pissutigalugu nalunaarusiat suliarineqanngillat

Kommune Kujallermi meeqqat atuarfiini aqutsisut pitsaassutsimik nalunaarutit inatsisitigut pisussaaffiliisut suliarisimanngilaat, nalunaarutit taakkua ajornartorsiutigineqartut paasineqarnissaannut iluaqutaasussapput minnerunngitsumillu atuarfinni ataasiakkaani pitsaassutsip ajunnginnerulernissaanut kommunalbestyrelsep sulineranut iluaqutaasussaallutik.

Allattoq Thomas Munk Veirum

marsip 01-at 2016 12:14

Nutserisoq Jaaku Lyberth

- Sulisunik amigaateqarneq tamatumunnga pissutaasoq atuarfeqarnermut meeqqeriveqarnermullu ingerlatsivimmi pisortaq Jens Korneliussen oqarpoq.

- Kommunemi atuarfinnit pitsaassutsimik nalunaarusianik 2015-imi tigusaaqanngilagut. Kommune Kujallermi Atuarfeqarnermut meeqqeriveqarnermullu ingerlatsivimmi pisortaq Jens Korneliussen KNR-imut ippassaq taama oqarpoq.

Pisortap oqarnera naapertorlugu tamatumunnga pissutaavoq, ingerlatsivimmi sulisut ikippallaarnerat.

- Kommune Kujallermi atuarfeqarnermut aqutsisoqarfimmi sulisut ikittuinnaapput kommuneni allani sulisunut aningaasaliinerisimasunut sanilliuluta.

Aamma atuaruk Kommune Kujallermi meeqqat atuarfiisa inatsit unioqqutippaat

Pitsaassutsimut nalunaarusiorneq 2012-imi decemberimi aalajangiiffigineqarmatali inatsisitigut pisussaaffiulerput.

Nalunaarusiat siunertaraat atuarfiit nakkutigineqarnissaat atuarfinnilu ajornartorsiuteqalerpat piaartumik paasineqarnissaa taakkua kommunalbestyrelsip sulineranut iluaqutaassammata.

Nalunaarusiat meeqqat atuarfiinni pissutsit ajunnginnerulernissaannut iluaqutaasussaapput tamannalu Kommune Kujallermi suliarineqarsimanngilaq.

Jens Korneliussenip innersuussutigaa, atuarfiit pillugit ingerlaavartumik kommunalbestyrelsi ilisimatinneqartartoq.

- Atuarfiit ataatsimiititaliaanik pilersitsinikuuvugut kommunitsinnilu atuarfinni ataasikkaani pisut pillugit ataavartumik nalunaarusiornikkut kommunalbestyrelse ilisimatinneqartarlutik.

Taassuma naatsorsuutigaa atuarfiit aqutsisoqarfii atuarfiillu ukiormanna ukioq atuarfiusoq pillugu nalunaarusiorumaartut kommunillu atuarfiini aqutsisut ilinniartinneqarnissaannut aningaasanik amerlanerusunik aningaasaliisoqarumaartoq.

- Kommune Kujallermi atuarfiit pillugit isumasioqatigeeqqammerpugut Narsarsuarmi, suliat ingerlaarnerat pitsaanerulernissaannik allattugarpassuaqarpugut, atuartitsinerit allaffissornerillu nalinginnaasumik pitsaassusaannik kivitseqataasussanik, Kommune Kujallermi Atuarfeqarnermut meeqqeriveqarnermullu ingerlatsivimmi pisortaq Jens Korneliussen oqarpoq.