Suliniut nutaaq suliffeqarfinnik peqqissunik pilersitsissasoq
Sulisut peqqissut nuannaartullu amerlanerulernissaat suliniutip nutaap pingaarnertut maanna anguniagaraa. Tassami CSR Greenland, Kalaallit Nunaanni Timersoqatigiit Kattuffiat, Peqqissutsimullu Naalakkersuisoqarfiup suliniut "Suliffeqarfiit peqqissut" pillugu suleqatigiinnissamik isumaqatigiissut ukiuni pingasuni atuuttussaq atsioqqammerpaat.
Suliffeqarfinni peqqissutsimik atugarissaarnermillu ikorfartuiniarluni siuarsaaniarlunilu peqqissuseq pillugu aaqqissuussaasumik aqutsinerup sulissutiginissaanut sakkussanik aalajangersimasunik suliffeqarfinnut neqerooruteqarnissaq isumaqatigiissusiortut kissaatigaat.
Innuttaasut peqqissuunerannik siuarsaanissaq suliniummi pingaarnertut anguniagaavoq, peqqissuserlu pillugu aallartitanik ilinniartitaaneq ilaatigut aallaavigalugu suliffeqarfiit peqqissuseq pillugu suliniutinik aallarnisaasinnaassallutik.