Suliniut Nunatsinnut aarlerinartoq
Ilulissani suliniut Newport, maanna unitsinneqareersoq pillugu attaveqarnermut naalakkersuisoq, Knud Kristiansen (A) silatusaaqqusivoq.
Naak kommunip suliaa soqutiginaraluartoq, Naalakkersuisut ataatsimiinnerni isumaqatigiinniarnernilu suliniummut Newportimut pisussaaffeqarnikuunngitsut, Knud Kristiansen oqarpoq.
- Naalakkersuisut isumaqarput una suliniut soqutiginartuusoq. Taamaakkaluartorli Naalakkersuisunit saqqummiivigineqartarnitsinni maluginiarsimavarput, suliniut arlalinnik apeqquserneqarsinnaasoq, Knud Kristiansen Radioaviisimut oqarpoq.
Naalakkersuisut avataaniit aningaasaliiniartunut akuersisimannginnerat, Siumumeersunit Qaasuitsup Kommuniani borgmesterimit Ole Dorphimit aamma Inatsisartut siulittaasuannit, Lars-Emil Johansenimit eqqumiigineqarpoq.
Aamma atuaruk Dorphip pilersaarusiarsuaq unitsittariaqarpaa
Aamma atuaruk Lars-Emil Johansen mianersoqqusisoq
- Naalakkersuisut pingaartippaat avataaniit aningaasalersuisoqarsinnaasoq. Kisianni tamatigut misissoqqissaagassaavoq. Suna siunertaava? Qanoq innuttaasunut kinguneqassava? Kikkut naggaterpiaani akilertussaavaat?, Knud Kristiansen oqarpoq.
Aningaasaleerusuttut piumasaraat Namminersorlutik Oqartussat qularnaveeqqusiissasut Knud Kristiansen oqarpoq. Tamassumalu saniatigut aningaasaliisutut iluanaarutissat 8 - 10 procentit akornanni piumasarineqartoq, attaveqarnermut naalakkersuisoq oqarpoq.
- Nunarput maannarpiaq 1/2 procentimut, imaluunniit 1 procentimut ernialinnik maanna atorsinnaavoq. Taamaammat nikingassut 7 procentip missaanniippoq, Knud Kristiansen nassuiaavoq.
Namminersorlutik Oqartussat qularnaveeqqusiisussat
Innuttaasulli aningaasatigut eqqorneqarsinnaaneranik ernumassut, Naalakkersuisut suliniummut Newportimut tapersersuiunnaarnerannut pissutaanerpaavoq.
- Suliniut Newporti iluatsippat taava Namminersorlutik Oqartussat qularnaveeqqusiinissaat piumasarineqarsimavoq. Tassa imaappoq suliaq ajutooraluarpat, qanorluunniit inuiaqatigiit akilertussaavaat, Knud Kristiansen oqarpoq.
Suliniut iluatsissimassappat Ilulissat kisimiilluni Nunatsinnut isaarianngussasoq, Knud Kristiansen aamma oqarpoq. Taamaalillunilu Kangerlussuaq Narsarsuarlu pisariaarutissallutik.
- Nunatsinni pingaarnertut, Nunatsinniit avammullu isaavik Ilulissat kisimiilissasoq. Taamaammat kujataamiunut tunumiunut allanullu tamanna eqartitsissaaq, Knud Kristiansen oqarpoq.
Aamma atuaruk Ilulissani takornariat pillugit periusissiaqanngilaq
