Suliniut atuartunik kajumissuseqalersitsivoq

Meeqqat atuarfianni atuartut naammassisut 40 procentiisa missaat ilinniarfinnut toqqaannartumik ingerlaqqinneq ajorput. Kisitsitsit ilinniartitaanermut naalakkersuisoqarfimmeersut tamanna ersersippaat.

Taamaammat atuartut suliffeqarfinnik soqutiginnilersinniarlugit, suliniaqatigiiffik CSR Greenland suliniuteqarpoq, taannalu iluatsilluarpoq.

Atuartut kajumissaarneqartut

CSR Greenlandip suliniutaa qulequtaqarpoq ''Suliffeqarfiit atuarfinnut - atuarfiit suliffeqarfinnut”. Atuartut naammassigaangamik toqqaannaq ilinniaqqinnissamut soqutiginnilernissaannik siunertaavoq.

Kisitsisimmi takutippaat, naammassisut quliugaangata sisamat ilinniakkamik aallartitaqanngitsut.

- CSR Greenlandimut suliffeqarfinnullu suliniummik pilersitsinissaq pingaaruteqarpoq, taamaasilluta inuusuttut inuunermik akisussaaffiginissaanut kajumissaarlugit isumassarsitissavagut 10. klasselu qimatsinnagu ilinniakkamik toqqaasinnaalissapput, CSR Greenlandimi pisortaq Lotte Frank Kirkegaard oqarpoq.

Sisimiuni iluatsittoq

Aasianni, Sisimiuni Paamiunilu 8. klassiniit 10. klassinut atuartut suliniummi siornaalli peqataapput. Sisimiunilu Minngortuunnguup atuarfiani iluatsillualereersimavoq.

Tassani atuartut suliffeqarfinnut pulaareerlutik sapiissuseqarnerulersimasut ilinniartitsisuisa maluginiarpaat.

Atuartut ilinniaqqiffissat suliffissallu suut piumasaqaatigineraat ilisimanerulermassuk, atuarfiup pisortaata Nivi Heilmann Efraimsenip iluarisimaarpaa. 

- Saaffissatik nalorpasinnginnerulerpaat, taavalu aamma siunissamut ilinniaqqinnissaminnut suut piumasaqaataanersut kiisalu pilersaarusiorsinnaanertik nalunngippasinnerulerpaat.

Qeqqata Kommuniani atuarfiit tallimat suliniummik taama ittumik peqataaniartut, kommuni paasissutissiivoq.