Suliniaqatigiiffiit: Meeqqanik aallarussineq pillagaassutaasinnaasariaqarpoq
Inatsilli nutaaq atuutilersinniarneqartoq naapertorlugu meeraq naalagaaffeqatigiiffiup avataanut aatsaat aallarunneqarpat unioqqutitsinerussaaq.
Danmark Savalimmiullu nunat allaanngillat - danskit ilaqutariinnermut inatsisaat malillugu taamaappoq, tassami naalagaaffeqatigiikkatta.
Angajoqqaat akisussaaffii pillugit inatsit nutaaq danskit isumaginninnermut ministeriata saqqummiussaa Inatsisartullu qaammatip uuma ingerlanerani oqaluuserisassaat aalassatsitsivoq.
Inatsimmi naapertorlugu anaanaasup ataataasulluunniit angajoqqaatut akisussaaqatigiinnermik isumaqatigiissuteqaraluarluni angajoqqaajusup aappaata akuerinngikkaluaraa meeraq Danmarkiliaappagu inatsisinik unioqqutitsinerunngilaq.
Tamannalu Meeqqat pillugit siunnersuisooqatigiit oqaaseqartartuata William Kriegelip tamanna isornartorsiorpaa.
- Upaaruaatigivarput uagut, una naalagaaffeqatigiikkalurluta, Danmarkilu Kalaallit Nunaallu, ungasittorujussuarmik nunat taakku marluk imminnut inissisimagamik. Taamaattumik meeraq anninneqarpat nunatsinninngaanniit Danmarkiliaallugu, taava meeraq angajoqqaaminut tamanut attaveqarnissaa kipitinneqassooq. Angalaniarnerit aamma akisoorujussuuneri pissutaallutik, tassa piviusuuvoq una meeraq aallarunneqarpat, isumaqatigiissutaanngitsumik aallarunneqarpat, taava meeraq eqqugaassooq angajoqqaami arlaat attavigiunnaavinnissaanut, William Krigel KNR-imut oqarpoq.
Nunat tamalaat akornanni isumaqatigiissutit aporfigineqartut
Inatsit nunat tamalaat akornanni meeqqat aallarunneqartartut pillugit Haagerimi aalajangersagaat malippaa, nunallu atsioqataasimasut killeqarfiit akimorlugit, soorlu Interpolikkut, meeqqanik ujaarinnissinnaanngortitsivoq.
Naalagaaffeqatigiinnerli nunatut ataatsitut isigineqarmat Danmarkip nunatta Savalimmiullu akornanni nuunneq inatsimmit tassannga ilaatinneqanngilaq.
Ilaatinneqartariaqaraluartorli Meeqqat Inuunerissut isumaqarput.
- Tassami aamma uggornaq taamatut isummertoqarsimanera, uani inersimasuusugut paarsisuaannartariaqarpugut meeqqat, illersorsinnaajuaannartariaqarpagut meeqqagut, taamaakkami aamma tassuuna illersoriarfissaqartuaannarnissaat anguniartuartariaqarparput, taamaammat uggornaqaaq taamatut oqariartortoqarsimammat, Britta Johansen Meeqqat Inuunerissuni siulersuisuni ilaasortaq taama oqarpoq.
Meeqqat pillugit siunnersuisooqatigiit Meeqqat oqaaseqartartuatigut, Meeqqat Inuunerissut, Namminersorlutillu Oqartussanit naammagittaallioraluartut danskit isumaginninnermut ministereqarfianit isornartorsiuineq msluginiarneqarsimanngilaq.
Inatsisartunit siunnersuut akuerineqassanngitsoq Meeqqat pillugit siunnersuisooqatigiit neriupput.
- Inatsisiliortut soorunami taakkua inatsisit tulluarsartussaassuaat, aamma uagut inatsisilerituujunnginnatta qanorpiaq taanna aaqqinneqarsinnaanersoq imannak toqqaannartumik tikkuarsinnaanngikkaluarlugu uparuartuutigiinnarparput taamatut inatsiseqartillugu pinngitsoorani nunatsinni meeqqat ilaat eqqugaasussaapput, William Kriegel KNR-imut oqarpoq.
Inatsisartut inatsisissatut siunnersuut siullermeerlugu marsip 25-ani suliarissavaat.
