Sulineq akilersinnaava?

Aningaasaqarnermut siunnersuisooqatigiit siulittaasuata tamanna akinissaa tunuarsimaarfiginngilaa:

- Arlalinnik iliuuseqartoqarsinnaavoq, namminersortut amerlanerusariaqarput, ilinniarneq qaffassarneqartariaqarpoq nuttarsinnaanerlu pisariaqarpoq. Suliffissat sumiinnerat apeqqutaatillugu nuttartarnissaq apeqqutaatillugu. Aammali sulinermi ajunngitsorsiassaqarnerunissaq apeqqutaavoq, sulilernernimi akileraarutinik akiliisariaqartarpoq aammali pisartakkat annaaneqartarput.

- Soorlu ineqarnermut tapiissutit, tassa ataatsimut isigalugu sulilerneq akilersinnaavallaarneq ajorpoq, sulineq akilersinnaanngitsoq aningaasaqarnermut siunnersuisooqatigiit siulittaasuata Torben S. Andersenip oqaatigaa, aaqqissuusseqqinnissarlu ujartorlugu.

500-miit 700 koruuninut.

Taama assigiinngitsigaaq, ilinniarsimanani sulilluni imaluunniit sofami angerlarsimaannarluni.  2014-nilli ingerlanerani suliffissaaleqisut amerleriarput.

Suliffissaqaraluarpoq, Sulisitsisut kattuffianiit oqaatigineqarpoq, sulisussaaruttarnerlu ajornartorsiutaammat nunanit allaniit tikisitsisoqartariaqartarpoq:

- Suliffiit ilaat pioreerput nunatsinni, kisianni oqaatigeriikkattuut avataaninngaanniit sulisussanik pissarsisariaqartarput, Bent Sørensen oqarpoq.

Qallunaatulli oqallinnermi Lars Emil Johansen sulisitsisut kattuffiat aningaasaqarnermut siunnersuisooqatigiilluunniit isumaqatiginngilai.

- Suliffissaaleqisut malersorlugit ajunnginnerarlugit oqaluffigineqassasut ilisimatuup oqaatigaa, suliffissaaleqisut artorsarput, Lars Emil Johansen oqarpoq isumaqarnanilu suliffissaaleqisut angerlarsimanissaq aalajangertaraat.

- Oqaartigisariaqarpara akileraartarneq atugarissaarnerlu pillugit isumalioqatigiissitami taama allaqqasoqanngimmat. Ajornartorsiutigut nunatsinnilu ajornartorsiutaasut aaqqissuussinerup iluani ilinniarnissamut killiliisut qanoq aaqqissanerigut oqaluuserisariaqarigut imarivaat. Ajortumik aallaaveqanngilaq nunatta nammineq aningaasatigut napanissaanut namminersulernissamullu tikkuisuuvoq, aallaavialu pitsaasuulluni.

Naaja Nathanielseni IA-meersoq oqallinnermi taama oqarpoq.  Ajornartorsiutit aaqqissagaanni ajornartorsiuteqarneq nassuerutigineqaqqaartariaqarpoq.

Anda Uldumip Demokraatineersip sulinermut ilanngaateqalernissaq siunnersuutigaa, suliffissaaleqisut taamaalillutik sulerusulissammata.

Atassutip isumaginninnikkut aaqqissuusseqqinnissaq tikkuarpaat taassuma qulakkiissammagu sulerusussuseqalerneq.