Suliffissarsiortut suli ikiliartorput

Suliffillit amerliartorput. Tassami oktobarimi ukioq manna siornamut taamaalineranut naleqqiullugu suliffissarsiortut 374-inik ikileriarsimasut, Naatsorsueqqissaartarfik taama allaaserisaqarpoq.
Allattoq Jens Thorin
novembarip 15-at 2016 10:22
Nutserisoq Erna Lynge

Imaappoq oktobari qaammat ukioq manna suliffissaaleqisut 2.475-it allatsissimapput.

Kalaallit Nunaanni sulisinnaasut naatsorsuuteqartinneqanngillat. Namminersorlutilli Oqartussat kisitsisaataat 2014-imeersut suli naatsorsuutaappata, taava sulisinnaasut 9 procentii suliffissaaleqisuupput.

Suliffissaaleqisutulli allatsissimasut tamarmik ingerlaannaq sulilersinnaanngillat.

Suliffissarsiortut pingajorarterutingajaasa oqaatsit matematikkilu eqqarsaatigalugit piginnaanerminnik tunngaviusumik kivitsinissartik pisariaqartippaat, imaluunniit inuuniarnikkut peqqinnissarlu eqqarsaatigalugu unammilligassaqarlutik.

Allat 61-it ingerlaannaq sulilersinnaanngillat assersuutigalugu sivisuumik arlaannik atornerluisuusimanerminnik katsorsarteqqaanngikkunik. Innuttaasullu tamakku eqqarsaatigalugit ilaat suliffeqaleqqinngisaannartuusut Naatsorsueqqissaartarfiup kisitsisaataasa ersersippaat.