GE SIK-lu: Suliffissarsiortut eqqornerusumik nalunaarsorneqartalerlik
Taamaammat peqatigiiffiit suliffissarsiortut eqqornerusumik nalunaarsorneqartalernissaat anguniarlugu Kalaallit Nunaata naatsorsueqqissaartarfianut saaffiginnipput.
Kalaallit Nunaata naatsorsueqqissaartarfiata nalunaarutigaa siorna suliffissarsiortut ukiup siulianut sanilliullugit 9 procentingajammik ikinnerusut. Nutaarsiassarlu tusarluarnartoq, GE SIK-lu isumaqarput.
AAMMA ATUARUK Sulineq akilersinnaasariaqarpoq
Peqatigiiffiilli naapertorlugit suliffeqanngitsut sulisinnaassuseqanngitsut sulisinnaassuseqartullu immikkoortinneqarpata, suliffissarsiortut ikinnerussapput.
- Inerniliisinnaasorivugut, suliffeqanngitsoqartoq, inuuniarnikkut ima aporfeqartigisunik, sulilivissinnaanatik, Sulisitsisut Peqatigiiffianni pisortaq Brian Buus Pedersen oqarpoq.
AAMMA ATUARUK Sulineq akilersinnaava?
Tamannalu SIK-p pisortaanit taperserneqaqaaq. Taanna naapertorlugu politikerit sulisitsisullu naatsorsueqqissaartarfimmit paasissutissat saqqummiunneqartut aallaavigalugit aalajangigaqartarput.
- Kisitsisit taakkua aallaavigalugit iliuuseqarniartaratta taamaammat sapinngisamik saqqummiunneqartut eqqortuusarnissaat pingaaruteqartorujussuuvoq, SIK-mi pisortaq Jess G. Berthelsen oqarpoq.
Suliffissaaleqisut naatsorsorluanngikkaanni suliffissaaleqineq pillugu politikkikkut kukkusumik aaqqissuusseqqittoqaratarsinnaasoq, GE isumaqarpoq.
AAMMA ATUARUK Enoksen: Aaqqissuusseqqinnermi tamatta pilliuteqassaagut
GE-p nammineq misissuinera naapertorlugu inuit sulilersinaanngitsut naatsorsueqqissaarnermiit peeraanni, arlalinnik illoqarfeqarpoq, suliffisarsiuittoqanngitsunik. GE naapertorlugu illoqarfiit ilaatigut tassaapput Nuuk, Paamiut Maniitsorlu.
Kalaallit Nunaata Naatsorsueqqissaartarfiata qanoq naatsorsueqqissaarnissaq pillugu Namminersorlutik Oqartussat oqaloqatigalugit KNR-imut ilisimatitsissutigaa.
