Suliffissaaleqisut pillugit sukaterisoqassasoq Enoksen isumaqarpoq

Suliffeqarnermut naalakkersuisoq, Hans Enoksen neriorsuivoq pisortanit ikiorsiissutit pillugit inatsit kommunit peqatigalugit sukaterisoqassasoq.

- Suliffissaqaraluarlutik uninngaannartut sulilerseqqinneqarnissaat anguniarlugu pisortat ikiorsiissutaat sukaterneqartariaqarput, Hans Enoksen Qanoruumut ippassaq pingasunngornermi oqarpoq imalu nangilluni aamma oqarluni.

- Nunanit allanit suliartortitsisarunnaarluta nunaqavissut sulilersinneqarnissaat imminut akilersinnaalertariqarpoq. Tassami assersuutigalugu maani Nunatsinni najugaqartunik sulisoqarsinnaagaluarluta, kiniserit Nunatsinnut tikisillugit sulisorineqartarneri naleqqutinngilaq.

Hans Enoksen oqarpoq. Pisortanillu ikiorsiissutinut inatsisip sukaterneqarnissaani kommunit tusarniarneqassasut oqarluni.

- Innuttaasut ilaasa atugaat pillugit kommunit qulaatiinnarlugit naalakkersuisut sukaterisinnaanngillat.

AAMMA ATUARUK Vil have færre sociale ydelser til de arbejdsklare

Naalakkersuisoq oqarpoq erseqqissaatigalugulu sukaterinermi ilaqutariit meeratallit ulluinnarni inuunerannik ajornerulersitsinnginnissaq mianersuunneqassasoq.

- Ilaqautariit meerartallit inuuniarnerata ajorseriannginnissaa pinngitsoorata qulakkeertariaqarparput.

Inuussutissarsiornermut, Suliffeqarnermut, Niuernermut, Nukissiuuteqarnermullu naalakkersuisoq, Hans Enoksen Qanoruumi apersorneqartilluni ippassaq ilaatigut taama oqarpoq.