Suliffissaaleqisut pilertortumik ikiorneqartalissapput
Suliffissaaleqisut pingasunut aggulullugit nalunaarsorneqartalerpata, kommuunit ullumikkut suliffissarsiortunut ataatsimut nalunaarsuisarnerat unitsinneqassaaq. Taamaaliortalernissarlu Qaasuitsup Kommuniani suliffissaqartitsiniarnikkut immikkoortortaqarfimmit isumalluarfigineqarpoq:
- Tassa kommunit suliffissaaleqisunut nalunaarsuisarnerannut iluaqutaasussatut naatsorsuutigaarput. Minnerunngitsumik suliffissaaleqisut pingasunut immikkoortiterneqartalernissaat. Taamaalilluta takusinnaanngussagatsigit kikkut qanoq sullisisanerlugit, kikkullu qanoq alloriarteqqissanerlugit, Qaasuitsup Kommuniani suliffissaqartitsiniarnikkut immikkoortortami pisortaq, Thora Siegstad, oqarpoq.
Nalunaarsueriaatsip nutaap eqqunneqarneratigut siunertarineqarpoq, kommunit pilertornerusumik takusinnaalissagaat suliffissaaleqisut qanoq ikiorneqarsinnaanersut.
Suliffissaaleqisut pingasunut aggulullugit nalunaarsorneqartalerneranni pisortat pilertornerusumik takusinnaanngussavaat kikkut erngerlutik suliffissamik tigusisinnaanersut, kikkut ikiorserneqaqqaarlutik aatsaat aallartissinnaanersut, kiisalu sorliit napparsimanertik imaluunniit allatut patsiseqarlutik suliffissamut innersuunneqarsinnaanngikkallarnersut.
- Suliffissarsiuussisarfimmut oqilisaassutaassaq suliffissaaleqisunut innersuussisarnissaq. Taavalu immikkut iliuuseqarfigineqartussat qanoq immikkut sullinneqarnissaat ilisimalissavarput, Thora Siegstad oqarpoq.
Suliffissaaleqisunut nalunaarsueriaaseq nutaaq atorneqalersussaq Namminersorlutik Oqartussanit isumagineqarpoq. Nalunaarsueriaaserlu nutaaq atorlugu aamma takuneqarsinnaanngusssaaq nuna tamakkerlugu suliffissaaleqisut qanoq amerlatiginersut.
Suliffissarsiortunut agguluilluni nalunaarsueriaaseq Danmarkimi ukiuni kingullerni atorneqarpoq, ilaatigut sakkortuumik isornartorsiorneqartarsimalluni kippaarippallaarnera pillugu, kiisalu ikiorneqarnissaminnut pisariaqartitsisunut sumiginnaatitsisartut nalilerneqartarluni. Tamatumali kingorna nalunaarsueriaaseq taanna nutarterneqarsimasoq Namminersorlutik Oqartussanit oqaatigineqarpoq.
