Siverth K. Heilmann: Suliffimmik ataqqinninneq ilikkartariaqalerparput

- Siullermik kaammattuutigissavara sakkortuumik nunatta namminiilivikkiartorneranut ingerlasugut, suliffimmik ataqqinninneq ilikkartariaqalerparput. 

Inatsisartut Inuussutissarsiornermut ataatsimiititaliaani siulittaasup Siverth K. Heilmannip aallakaatitsivimmi oqallinneq taama aallarnerpaa. Sulinngitsoornermulli pissutaasut assigiinngitsut immikkoortinneqarnissaat aamma pingaartuusoq erseqqissaatigaa.

- Napparsimaneq taanna allaavoq, kisianni imigassamik peqquteqarluni suliartunngitsoornerit tusaamasagut amerlavallaaleqaat. Isumaqarpunga taanna tamatta suliassarigipput, Atassummeersoq Siverth K. Heilmann taama oqarpoq. 

Kommuneqarfik Sermersuumi utoqqarnik sullissinermi sulisut akornanni napparsimasoqartarnerata ajornartorsiutaanera Qanoruumi ataasinngormat sammineqarpoq. Sulisoq ataaseq ukiumut agguatigiissillugu ulluni 21-ni napparsimasarpoq. Danmarkimut assersuutissagaanni, sulisoq ataaseq ukiumut agguaqatigiissillugu ulluni 8-9-ni napparsimasarluni.

Aamma atuaruk Utoqqarnik sullissisut napparsimakulasarnerat kommunimut akisusoq

Inuit Ataqatigiinneersoq Múte B. Egede Qanoruumi aamma oqalleqataavoq. Taanna sakkortuumik kajumissaaruteqarluni aallarniuteqarpoq:

- Ingerlaqqittariaqarpugut, pissutsit taamaaginnarsinnaanngillat, Inuit Ataqatigiinneersoq Inatsisartullu Inuussutissarsiornermut ataatsimiititaliaanni ilaasortaasoq taama oqarpoq. 

- Namminersulersimanerput aamma isumaqarpoq. Immitsinnut piumaffiginissarput immitsinnullu aqutsisinnaalernissarput. Taanna inuiaqatigiittut siulliullugu oqallisigisariaqarparput piviusunngortittariaqarlugulu, Múte B. Egede taama oqarpoq.

Aamma atuaruk Napparsimakulasarnerit pissutigalugit Steffenip anaanami nangia taarsertariaqartaraa

Taanna isumaqarpoq pisortanit ikiorsiissutinik isumalluuteqarani sulinissaq aningaasatigut akilersinnaasariaqartoq.

- Taamaaliornikkut amerlanerusut sulinermik ornigisaqarnissaat anguneqarsinnaassammat, Múte B. Egede oqarpoq.

Inuit Ataqatigiit upernaakkut ataatsimiinnermi oqallisissiamik aaqqiissutissanut siunnersuutinik imaqartumik saqqummiussissamaartut, Múte B. Egedep oqaatigaa.

Oqallinneq allaaserisaq qulaatungaani tamakkerlugu isiginnaarneqarsinnaavoq