Aalisarneq pillugu inatsit: Suliffiit qassit pilersinneqassanersut nalunartoq

Amerlanerusut aalisarnermi sulinissaat Naalakkersuisut kissaatigaat, tamannalu aalisarneq pillugu inatsisissatut siunnersuumminni qulakkeerniarlugu. Suliffiilli qassit pilersinneqassanersut suli nalunarpoq.
Karl-Kristian Kruse, Maj 2015. Assi © : Nauja Møller, KNR
aggustip 18-at 2017 15:14

Aalisarneq pillugu inatsisissatut siunnersuut 300 millionit koruuninik ukiumut siunissaq ungasinnerusumi annaasaqaataasinnaasoq siunnersuutip nassuiaataani allaqqavoq.

Aningaasalli kisimik aallaavigineqassanngitsut, Naalakkersuisut isumaqarput. Aalisarnermit sinneqartoorutit amerlanernut siammarternissaat, suliffissanillu amerlanerit pilersinneqarnissaat siunertarineqartoq, taakku isumaqarput.

Tamannalu aalisarnermut naalakkersuisup, Karl-Kristian Krusep Qanoruumi sisamanngormat apersorneqarnermini oqaatigeqqippaa.

- Politikkikkut anguniagaavoq, imartatsinni qallorneqartut tamakkiinerusumik niuerutigineqarnerata eqqunneqarnissaa. Aamma taassuma malitsigisussaavaa sulisut suli amerlanerusut pilersinneqarnissaat, Karl-Kristian Kruse taama oqarpoq.

Inatsit maannatut isikkoqartillugu akuerineqassappat, suliffissat ikinnerulissasut, Sulisitsisut Peqatigiiffiata, Sulinermillu inuussutissarsiuteqartut Kattuffiata ernumassutigaat.

AAMMA ATUARUK Siunnersuut akisussaassuseqanngitsuliorneruvoq

AAMMA ATUARUK Inatsisissatut siunnersuut nangiarnarpallaarpoq

Inatsillu suliffissanik qassinik pilersitsissanersoq Karl-Kristian Krusep Qanoruumi apersorneqarnermini akisinnaanngilaa.

- Maannangaaq inatsisissaq suli piariinngitsoq, inatsisip suliarineqarnerani taanna inissaminiinngilaq eqqartuleriissallugu. Kisianni siunniussaavoq, sulisutigut aamma inerisaaqqinnermik taanna annertuumik malitseqartussaasoq, aalisarnermut naalakkersuisoq, Karl-Kristian Kruse, Qanoruumut sisamanngormat oqarpoq.