Suliffigisami aappariittarneq Naalakkersuisut akuerigigaat
Sulisulli aappariittarnerat Namminersorlutik Oqartussani inerteqqutigineqanngilaq. Nikolaj Jeremiassenip §37 naapertorlugu apeqquteqaataanut akissummi tamanna naqissuserneqarpoq. Namminersorlutimmi Oqartussat ajornartorsiutinik pilertoqannginnissaa qulakkeerniarlugu asanninneq pillugu politikkiliorsimapput.
Tassani atuarneqarsinnaavoq suleqatinik asanninnikkut inooqateqarneq suleqatinut ammaffigineqassasoq, pisortarisamillu asanninnikkut inooqateqaraanni qullersarisat ilanngutitinneqassasut, nammineq inuttut inuunerup sulinerullu avissaartikkuminaassinnaanerat pinngitsoortinniarlugu.
Aamma Namminersorlutik Oqartussat naqissuserpaat ileqqorissaarluni pissusilersornissamut tunngasunut asaqatigiittut inooqatigiinnermut atassuteqartillugu immikkut ittumik malittarisassanik tassungaannaq tunngasunik aalajangersaaniaratik, sulisulli tamarmik suliffimmiinnerminni ileqqorissaarlutik pissusilersussapput, aamma asanninnikkut inooqatiginnerminnut tunngatillugu.