Nunatsinni partiit annerit aappaattut inissisimasoq Siumut Qasigiannguani ulluni makkunani ataatsimersualeruttorpoq. Pisut siulliit ilagaat siulittaasup nalunaarusiaminik saqqummiussinera. Taassuma akunneq ataaseq sinnilaarlugu oqalugiutigaa.  

Siulittaasup Erik Jensenip nalunaarummini eqqartugai ikigisassaanngillat. Naak ataatsimeersuarneq Qasigiannguani silagissuup ataani ingerlanneqaraluartoq, siulittaasup nalunaarutaaneersut ilaatigut assoralisimaarnermut tunngapput.

Erik Jensenip ilaasortat 50-it missaanniittut sassarfigigamigit, partiimi ikiaroornartoq hashi akuersaarneqanngilluinnartoq oqaatigaa. Taama oqarnera, inunnut ataasiakkaanut tunngasunut sulianut, partiimut qinersinerup kingullermiilli erloqissutaasimasunut tunngassuteqarsinnaalluarpoq.

Taama oqarnerminut ilanngullugu oqaatigaa, kannguttaatsuliorneq matumani aamma akuersaarneqassanngilluinnartoq. Taakkulu ingalassimaarniarlugit politikkimik pilersitsisimallutik oqaatigaa, taamaaliornikkut pasitsaassisoqassagaluarpat saaffissat nalornissutigineqassanngimmata.

Sulianik inunnut ataasiakkaanut tunngassuteqartut partiimut kingunerluuteqartitsisut

Suliat inunnut ataasiakkaanut tunngasut partiimut kingunipiloqartut ataatsimut isigalugu ikigisassaanngillat. Siumut borgmesterinik pingasunik qinersinermi kingullermi annaasaqartoq siulittaasup nalunaarummini eqqaavaa. Suliat matumani pineqartut borgmesterinut ataasiakkaanuinnaq kingunipiloqaannaratik partiimut  kingunipiloqarnerat naqissuserpaa. Suliat taakku peqqutaallutik innuttaasut partiimut tatiginninnertik annaasaraat, siulittaasup oqaatigaa.

Aamma atuaruk - Siumumi akerleriittoqarsinnaanera Inatsisartunut qinersinissamik kinguneqarsinnaavoq

Suliaq Avannaata Kommuniani 2021-mi qinersisoqarnerani borgmesterinngortussaagaluartumut Minik Høegh-Dammimut tunngassuteqartoq oqalugiaammini, atinik taasinngikkaluarluni eqqaavaa. Suliaq pineqartoq ikiaroornartumut tunngassuteqarpoq, ilaasortaajunnaarsitaanermik kinguneqartoq – ikiaroornartorlu partiimi akuersaarneqarsinnaanngilluinnartoq maanna partiimi politikkiliarineqarluni.

Erik Jensenip Kuannersuarnut tunngatillugu suliap ingerlasimanera ajuusaarutigalugu aamma oqaatigaa, taamalu pisoqaqqinnginnissaa kissaatiginerarlugu, qinersinermillu kinguneqaqqinnginnissaa neriuutigalug.

Immikkoortortaqarfiit tusaaniarnerorusukkai

Piffissaanngitsukkut qinersisoqannginnissaa Siumumit kissaatigineqartoq siulittaasup ilanngullugu oqaatigaa. Partii patajaannerusumik ingerlanneqalerpat anguniakkat piviusunngornissaat aatsaat anguneqarsinnaavoq.

Naggasiinerminilu assingusumik oqaaseqarpoq, Siumumi tunuliaquttani tusarnaarnerussallugit. Ingammik Parisimi isumaqatigiissummut tunngatillugu, immikkoortortanimi siulittaasut isumaqarput nunarput tassunga ilaalissappat nunatsinni ineriartorneq unikaallassasoq.

Aamma atuaruk Siumukkormiut uranimut angertut

Parisimi isumaqatigiissut Erik Jensenip Naalakkersuisunilu ilaasortat saqqummiussaat immikkoortortaqarfiit akerleraat.Taamaalillunilu Erik Jensen annertuumik suliassaqalerpoq.

Taamaattorli siulersuisuunerit naalakkersuisooqatigiinnermik suli upperinninnerat attasserusunnerallu taassuma oqaluttarfimmiit oqaatigaat.