Suleqatigiiffik: Qaasuitsup Kommunia matoqqavallaarpoq!

Qaasuitsup Kommuniani kommunalbestyrelsimi ilaasortat marluk, Knud Kristiansen (A) aamma Kristian Jeremiassen (S), siorna novembarimi siunnersuuteqarput Qaasuitsup Kommunia avinneqassasoq.

Siunnersuut aallaavigalugu kommunalbestyrelsi Qaasuitsup Kommuniani Qullersaqarfimmut suliakkiivoq suleqatigiissitamik pilersitseqqusilluni. Suleqatigiissitaq inuttaasunit, soqutigisaqaqatigiinnit, partiinillu tamanit inuttaqartussatut kommunalbestyrelsimit kissaatigineqarpoq.

- Tassa naalaamisaarsimagaluarpugut. Ilaatigut kikkut inuttaanersut, peqataanersut ilisimarusullugutigu. Kisiannili ulloq manna tikillugu taakkuluunniit nalunaarutigineqarnikuunngillat, Peter Frederik Gedionsen oqarpoq.

Suleqatigiissitarli pilersinneqanngilaq, taarsiullugulu suliassaq politikkikkut aningaasaqarnermut ataatsimiititaliamit ingerlanneqalerpoq, saniatigullu kommuunip iliuusissatut pilersaarutaanut ilanngunneqarluni.

Tamannalu Aasiaat pillugit suleqatigiiffiup pakatsissutigaa.

- Kisianni piffissaq imaalivoq. Taannalu suleqatigiissitaq annertunerusumilluunniit qarluallanninnguamik tuttaqarnikuunngilaq. Taamaattumik innuttaasut aamma oqalliseqataanissaat pillugu pakatsinarpoq taama matoqqatigisumik Qaasuitsup Kommunia suleriaaseqarmat, Peter Frederik Gedionsen oqarpoq.

Qaasuitsup Kommuniata avinneqarnissaanut siunnersuut, kommunalbestyrelsip novembarip 23-ani ataatsimiileruni eqqartoqqissavaa.