Suka K. Fredriksen: Kujalliup aningaasaqarnera aaqqittariaqarpoq

Nunatta taamatullu Kommune Kujalliup aatsitassarsiorneq aqqutigalugu aningaasaqarnerata ilorraap tungaanut saatinneqarnissaa sulissutigissallugu, makitsinikkut Inatsisartunut ullumi ilaasortanngortup, Siumumeersup Suka K. Frederiksenip oqaatigaa.
decembarip 08-at 2014 20:16

- Qineqqusaarnitta nalaani Siumumiit oqariartuutigaarput, Nunarput aningaasatigut aaqqissuuteqqinneqartariaqartoq. Taamaaliussaagut aningaasat pilerngutiinnarnagit annertusarneqarnissaalli suliniutigalugu. Tamanna suliassaq annertuvoq, Inatsisartunilu sulileruma tamanna suliarissallugu qilanaaraara.

Siumut sinnerlugu Inatsisartunut ilaasortaalersoq taama Radioaviisimut oqarpoq.

Qinersinermi Suka K. Frederiksenimut taasisut, taamatullu avannaamiumut Jess Svanemut taasisut amerlaqatigiinneri pissutigalugit, kina taakkunani Inatsisartunut ilaasortaalissanersoq makitsinikkut ullumi aalajangerneqarpoq. Tassaku Suka K. Frederiksen makitaavoq.

Taanna aperaarput Naalakkersuisut toqqarneqalerpata taakkununnga akuuniassanersoq, Suka K. Frederiksenilu ima akivoq.

- Tamanna maanna aalajangiutissallugu pissusissamisuunngilaq. Qineqqusaarutigisama, tassa Nunatta pitsaanerusumut aallariartinneqarnissaa suliarissallugu pingaarneruvoq. Pingaarnerutinngilara qanoq inissinnissara, kisianni ataatsimiititaliani pingaaruteqartuni suleqataanissara naatsorsuutigineqarsinnaavoq, Suka K. Frederiksen oqarpoq.

Taanna aamma aperaarput, Kuannersuarni aatsitassarsiornissamik pilersaarut nammineq inuttut qanoq isumaqarfigineraa, tamanna pillugu Suka K. Frederiksen ima akivoq.

- Nunatta aningaasaqarnikkut nammineq nammattuunissaanik Aningaasaqarnermut Siunnersuisoqatigiit oqariartuutaat isiginngitsuusaarsinnaanngilarput. Tamanna eqqarsaatigalugu isiginngitsuusaaginnarsinnaanngilarput aatsitassarsiorneq annertunerugaartumik aallunneqarnissaat. Tamanna suleqataaffigissallugu uanga piareersimaffigaara.

Inatsisartunut ilaasortanngorlaaq, Suka K. Frederiksen Siumut taama oqarpoq.