Suiaqatigiit katittarnerat pillugu inatsit akuersissutigineqartoq
Suiaqatigiit katissinnaalernissaat 27-nit akuersissutigineqarluni akerliuffigineqaranilu taasissutigineqarpoq. Inatsisip oktobarip aallaqqaataani atuutilersinneqarnerata peqatigisaanik aappariittut nalunaarsorsimaneq pillugu inatsit atorunnaassaaq.
Aappariittulli taamatut nalunaarsorneqarsimasunut aappariittut nalunaarsorsimaneq pillugu inatsist suli atuutissaaq. Taakkulu periarfissaqarput aappariinnertik kommunalbestyrelsimi siulittaasumit imaluunniit Naalagaaffiup sinniisuanit allanngortissinnaallugu.
AAMMA ATUARUK Suiaaqatigiit katissinnaanerat pillugu inatsisissaq kinguaattuungaatsiassaaq
Justus Hansenip (Demokraatit) Inatsisartut 2010-mi ukiakkut ataatsimiinneranni siunnersuuteqarneratigut Inatsisartut isumaqatigiissut aalajangerput Aappariilertarneq aappariikkunnaartarnerlu pillugit inatsit nutarterneqassasoq, assigiimmik suiaassusillit katissinnaanngortillugit. Inatsilli naalagaaffiup oqartussaaffiata ataaniimmat, Danmarkimi suiaqatinoortut katittarnerat pillugu inatsisip 2012-imi akuersissutigineqarnissaa utaqqeqqaarneqarpoq, kingornatigullu kukkuluttortoqarneratigut siunnersuut 2014-imi upernaakkut ataatsimiinnermi ilanngunneqanngitsoorpoq, kingornalu aamma ukiakkut ataatsimiinnissaq qinersisoqarnissaa pissutigalugu taamaatiinnarneqarluni.
