Suanngarsaatitortoq pillarneqarpoq

Nukkassarluni inerteqqutinik suanngarsaatitorsimasutut pineqaatissinneqartut siullersaat timersoqatigiit kattuffiani suanngarsaatitortunut nakkutilliisut sakkortuumik pillaatisiaqartippaat, timersortartunut maligassiuinnginniassammat.

Sakkortuumik pineqaatissinneqartoq timersortartut  peqatigiiffiinut sunulluunniit ilaasortaanngilaq. Nukassartartoq septembarip naaneraniit ukiut marluk sungiusaqqusaananilu unammeqqusaajunnaartinneqarpoq.

Timersoqatigiilli Kattuffiata Nuummi nukkassartarfik Fit and Fun isumaqatigiissuteqarfigisimavaa kalerreeqqaaratik misissuisarniarlutik, qanittukkullu misissuinermi paasineqarpoq nukassartartut ilaat inerteqqutaasunik anabolske steroidinik suanngarsaatitorsimasoq. Timersoqatigiit kattuffianni  siulittaasup Nuka Kleemannip neriuutigaa timersortartunut pineqaatissiineq atuinnginnissamik maligassiuiumaartoq.

- Neriuutigaara timersortartut nukkassarluni suanngarsaatitorsimasoq malissanngikkaat, erseqqissaatigissavaralu akuersisitseqqaarata inuttaali akuersisillugit misissuisinnaagatta. 

Nuka Kleemandip aamma oqaatigaa nunatsinni timersortartut suanngarsaatitortuunngitsut, taamaattutortannginnerlu ersersikkaat nunatsinni timersortartut suanngarsaatitortannginnissaq ilisimalluaraat.

Timersoqatigiit kattuffianili suanngarsaatitortunut nakkutilliisut siumut kalerreeqqaaratik misissuisarniarlutik aalajangersimapput, suanngarsaatillu suussusii apeqqutaatinneqassanngillat.

- Assigiinngitsorpassuupput inerteqqutit, nunarsuarmilu inerteqqutit isumaqatigiissutaasut uagut malinniartussaavavut.

Nuka Kleemannip ilanngullugu erseqqissaatigaa nioqqutissat qasunaveersaatit pineqanngimmata. Nukkanneruniarluni suanngarsaatitortarneq ingammik inuusunnerusunut sinerissami timersortartunut amerlasuunut paasititsiniutigineqareersimavoq.