Per Stig Møller nunatsinniippoq

Inatsisartut upernaakkut ataatsimiinnerminni ullumi 14-issaannik ataatsimiissapput, ullumilu oqaluuserisassat ullaap tungaani allannguuteqassanngikkunik 14-iussapput.

Danmarkip nunanut allanut ministeria Per Stig Møller tusarnaartunut ilaassaaq.

2005-imi nunanut allanut tunngasunik nassuiaat, aningaasaqarnermut Nunanullu allanut Naalakkersuisumit Josef Motzfeldtimit saqqumiunneqassaaq. Per Stig Møllerillu nunatsinnut tikeraarnera ileqquusunut ilaavoq:

- Namminersornerunerup eqqunneqarneraniilli tamanna ileqquusimavoq. Nunanut allanut tunngasunik nassuiaat saqqummiunneqaraangat danskit nunanut allanut ministeriat peqataasarpoq, Aningaasaqarnermut nunanullu allanut naalakkersuisoq Josef Motzfeldt oqarpoq.

Taassuma saniatigut ullumi oqaluuserisassanut ilaassapput; Naalakkersuisut Inatsisartullu pillugit Inatsisartut inatsisissaattut siunnersuummik suliaqarnissamik suleqatigiissitat suliassaasa allangortinneqarnissaannut aalajangiiffigisassatut siunnersuutip siullermeerneqarnera.

Inatsisartut ataatsimiittarfiata partiillu allaffeqarfiisa ataatsimiittarfiisalu allilerneqarnissaat pillugu Inatsisartuni siulittaasoqarfiup pilersaarutaasa ingerlateqqinneqarnissaannut 2006-imi aningaasanut inatsimmit illuatitsisoqarnissaanik siunnersuutip siullermeerneqarnera aamma ullumi oqaluuserineqassaaq.

Tamatuma saniatigut ullumi aamma oqaluuserisassaniippoq, Inatsisartuni ilaasortap Inuit Ataqatigiinneersup Agathe Fontain-ip siunnersuutaata aappassaaneerneqarnera. Taanna nunatsinni meeqqat sumiginnarneqarsimasut pillugit ukioq manna nuna tamakkerlugu qaammarsaanermik ingerlatsinissamik oqallitsitsinissamillu Naalakkersuisut aallartinissamik peqquneqarnissaannik imaqarpoq.