Naatsorsueqqissaarnerit assigiinngisitsinermik takussutissiinngillat

Nunaqavissunik assigiinngisitsisoqarpoq, oqarput. Qinikkalli sukkavallaamik inerniliipput, pineqartorlu ingasaallugu paasivaat. Naatsorsueqqissaartarfik taama oqarpoq.

Nunaqavissut nunanit allaneersunut naleqqiullugit aningaasarsiakinnerusut kisitsisit saqqummiunneqaqqammersut takutippaat, tamannali assigiinngisitsinertut nalilerneqarsinnaanngitsoq Søren W. Børgesenip Naatsorsueqqissaartarfimmeersup oqaatigaa:

- Kisitsisit takutippaat nunani allani inunngorsimasut nunaqavissunut naleqqiullugu ataatsimut isigalugu aningaasarsiaqarnerusut, kisiannili sooq taamaattoqarnersoq oqaatiginngilaat, Søren W. Børgensen, Kalaallit Nunaanni Naatsorsueqqissaartarfimmeersoq oqarpoq.

Aamma atuaruk Sara Olsvig: Inuiaqatigiinni naligiinnginneq annertusiartuinnarpoq

Suminngaanneersuuneq apeqqutaalluni naligiinngitsumik ajoraluartumik pisoqarneranik taallugu Inuit Ataqatigiit siulittaasuata Sara Olsvigip maajip aallaqqaataani oqalugiarnerminut atatillugu oqaatigaa, naatsorsueqqissaartarfiullu kisitsisillu saqqummiunneqartut takoreerlugit SIK-p siulittaasuanit Jess G. Berthelsenimit aamma uparuarneqarput:

- Assorsuaq ajuusaarnarpoq, tassami 1993-imi 1994-imilu taamanikkut naalakkersuisullu atsioqatigiippugut taamatut assigiinngisitsilluni aningaasarsiaqartitsisarneq unitsinneqassasoq, SIK-p siulittaasua Jess G. Berthelsen taama oqarpoq.

Naatsorsueqqissaartarfiulli kisitsisaatai 14-init qummut ukiullit namminneerlutik nalunaarsuisimaneranneersuupput, kikkullu ilinniagaqarsimassusiat aallaavigalugu nalunaarsugaallutik.

Tassa meeqqat atuarfiannit, ilinniarnertuunngorniarfimmit, inuussutissarsiutinut ilinniarfinnit nangitsillunilu ilinniarfinnit naammassisimanerit. Taamaasilluni nakorsaaneruneq meeqqerisuunerluunniit apeqqutaaneq ajorpoq.

Ilinniarsimasat apeqqutaallutik isertitanut sunniutaat uani atuaruk 

Suliffissaaleqisut Naatsorsueqqissaartarfiup nalunaarsugaanni aamma ilaatinneqarput, Naatsorsueqqissaartarfiullu oqaatigaa nunaqavissut akornanni suliffissaaleqisut nunanit allaneersut suliffissaaleqisunut naleqqiullugit aningaasarsiakinnerusut.

Nunanillu allaneersut ataatsimut isigalugu aningaasarsiaqarnerunerat immikkut ilinniarsimanermik, misilittagaqarnermik imaluunniit sulinerunermik tunuliaqutaqarnersoq aamma takuneqarsinnaanani.

Assigiinngisitsisoqarneranilli oqarluni kisitsit taamaammat atorneqarsinnaanngitsut Naatsorsueqqissaartarfiup oqaatigaa:

- Sukkavallaamik inerniliisoqartarnera pineqartorlu ingasaallugu paasineqarsinnaanera ajuusaarutigaara, isertitat aningaasarsiallu assigiissinneqartarnerat ajuusaarnarluni, Søren W. Børgesen, Kalaallit Nunaanni Naatsorsueqqissaartarfimmeersoq oqarpoq.

Ilanngutassiami siullermi allapparput Inuit Ataqatigiit maajip aallaqqaataani qisuariaateqarnerat naatsorsueqqissaartarfimmiit naatsorsuinernut qisuariarnerusoq, tamannali inuiaqatigiinni annertuumik oqallinnermut qisuariarnerusoq, IA KNR-imut allappoq.