Siunnersuinerup kalaallit Midtjyllandimi ilinniartut tapersissagai
Kalaallit Danmarkimi ilinniarfinni ingerlaqqiffiusuni ilinnialersut sisamararterutaat ilinniakkaminnik unitsitsisarput.
Aarhusilli Universitetiata siunnersuinermut tapersersuinermullu sullissivia kalaallinut Region Midtjyllandimi ilinniaqqiffinni ilinniakkaminnik aatsaat aallartitsisunut immikkut ittumik siunnersuinermik maanna misiliuteqarnialerpoq.
AAMMA ATUARUK Danmarkimi ilinniartut ilinniakkaminnik taamaatitsiinnartarnerat ministerip misissorumagaa
Neqerooruteqarnerat kalaallit Danmarkimi ilinnialeqqaarnerat pillugu apersuisimanernik arlalinnik tunngaveqarpoq, suliniummi akisussaasoq, atuarnermut allannermullu siunnersuisartoq, Louise Kold-Petersen oqarpoq.
- Ajornakusoortitsisarnerit ilaat ilinniarnermi ikaarsaariarnermut attuumassuteqartarput. Ilinniarnermilu ikaarsaariarnermi misigisat allat attuumassuteqartut aamma ilaasarput.
Ilinniartut aqqanillit saaffiginnereersut
Kalaallit ilinniartut 14-it missaanniittut juullip tungaanut immikkut ittumik siunnersorneqarsinnaapput. Ilinniartut aqqanillit siunnersorneqarlutik oqaloqateqarnissamut nalunaareerput, amerlanerusullu ukiap ingerlanerani aamma saaffiginninnissaat Louise Kold-Petersenip naatsorsuutigaa.
Kalaallit ilinniartut atugarsornermi inooqataaniarnermiluunniit ilungersuuteqarnersut aallaqqaammut paasiniarneqassaaq.
AAMMA ATUARUK Inatsisilerituunngorniarneq nutaaq soqutigineqarluartoq
- Imaassinnaavoq ’ilinniarnermi misilittagalimmik pisariaqartitsinerusutit’ imaluunniit; ’allannissamut siunnersortimik attaveqartariaqarnerusutit’. Inooqataanermiluunniit atukkat pillugit? Taamaalilluta suna naleqqunnersoq paasinerussavarput.
Avalap suliniut nersualaarutigaa
Kalaallit Danmarkimi ilinniartut peqatigiiffianni siulittaasup, Hans Peter Mønstedip Aarhusimi suliniut nersualaarpaa.
Taassuma ilinniarnerup aallartinnera ajornarnerpaasarnerarpaa, matumanilu nalaatat atugarsornermilu piumasaqaatit ilinniartunut ataasiakkaanut sakkortusinnaanerarlugit.
- Ilinniartunut ajornartorsiutaasut ajornartorsiutaalersinnaasullu siusinnerusumi sulissuteqarfigineratigut atugarsornerit allanit assersuutigalugu oqaatsitigut unammillikkanit sukataarfiginerunissaannut periarfissagissaarnerussaaq, Hans Peter Mønsted.
Pilersaarut danskit naalakkersuisuisa Issittumi ilisimatusarnermut ilinniagaqarnermullu iliuusissiaata danskit naalagaaffianit 485.000 koruuninik taperserneqartup ilagaa.
AAMMA ATUARUK Aaqqissuusseqqinnikkut aaqqiissutissat kinguarsarneqarput
