Srilankamiut 500.000-it angerlarsimaffitik qimattariaqaraat

Sri Lanka qarsutsinernit 2003-miilli aatsaat taama eqqugaatigaaq. Inuit 146-t ajunaareerput.
Allattoq Ritzau
maajip 28-at 2017 18:36
Nutserisoq Ivik Kristiansen

Sri Lankami sialussuareersoq inuit 500.000-ingajaat angerlarsimaffitik qimattariaqarsimavaat.

Nunap peqqinnissamut ministeria, Rajitha Senaratne taama ilisimatitsivoq.

Suliniaqatigiiffik Red Barnet naapertorlugu srilankamiut angerlarsimaffeeruttut 10 procentii, tassalu 50.000-it missaat, suli tallimanik ukioqalinngillat.

Sri Lankami sumiiffinni amerlasuuni tallimanngormat aatsaat taama siallertigaaq. Sialussuarneratalu kinguneranik ukiuni 14-ini aatsaat taama qarsutsisoqartigalunilu nunamik sisoortoqartigaaq.

Inuit 146-t ajunaarsimasutut sapaatiummat nalunaarsorneqarput. Aamma 112-it maqaasineqarput, inuillu 50-it missaanniittut aqqunartitersimallutik napparsimmavinni uninngapput.

Ajunaartut amerlanerpaat sialussuarnerup marrammik qaqqanit illunut sisoortitsineranit ajunaarput.

Annaassiniartartut angerlarsimaffeeruttorpassuarnut sapaatiummat ikiuipput.

    /ritzau/AFP