Skaale: Spaniami pisoq Naalagaaffeqatigiinnermut ersisaarutaavoq
- Catalonia namminersulerteriarlugu ukiut tallimat atuutsereerlugu maanna kipinialerpaa, Cataloniamut qinersinernik arlaleriarluni alaatsinaakkiartortarsimasoq, Sjúrður Skaale oqarpoq.
Namminersorneq pillugu inatsisip immikkoortorpassui, Spaniap inatsisartuinit, nunallu immikkoortuanut naalakkersuisunit akuersissutigineqarsimasut inatsisinut tunngaviusunut eqqartuussiviup 2010-mi atorunnaarsippai.
Namminersorluni oqartussaassuseqarnerutitsineq spanskit tunngaviusumik inatsisaannut Partiip Partido Popularip akerliusorimmagu inatsit tunngaviusoq aallaavigalugu eqqartuussivimmut suliassanngortinneqarpoq.
AAMMA ATUARUK Cataloniap siuttuata Spania isumaqatiginninniarfigerusukkaa
- Taama iliorneq politikkikkut silatusaanngitsuliorneruvoq, anneruniarnerulluni, innimiilliornerulluni paasisassaanngiivillunilu. Taamaaliornerlu ukiuni arfineq-marlunni kinguneqassasoq naluneqanngilaq, Sjúrður Skaale oqarpoq.
Tupaallannaangilaq
Namminersulernissamik ilungersuussaqartut tapersersorteqarnerulermata Cataloniallu Spaniamit namminersulernissaa pillugu innuttaasut oktobarip aallaqqaataani taasisinneqarmata, taasisut 90 procentii namminersulernissamut taasipput. Spanialli taasisitsineq akuerinngilaa.
AAMMA ATUARUK Cataloniap namminiilivittunngornini ullualunnguit qaangiuppata suaarutiginiaraa
Cataloniap namminersorluni oqartussaassuseqarnerulernissaanut aalajangerneq tunngaviusumik inatsit atorlugu akorngusersorneqarsimanngitsuuppat taama pisoqarsimanavianngitsoq, Sjúrður Skaale isumaqarpoq.
Danmarkillu naalagaaffeqatigiinneq attatiinnarusuppagu spaniami pisoq ilinniarfigisaqarsoraa.
- Tunngaviusumik inatsit tigullugu kissaatisi inatsisinut unioqqutitsinerusut oqartoqarsinnaagaluartoq, taamaaliorneq sianiilliornerujussuuvoq, Sjúrður Skaale oqarpoq.
AAMMA ATUARUK Tunngaviusumik inatsit Danmarkip tunngaviusumik inatsisaata ataaniissaanngilaq
Tunngaviusumik inatsit maleqqissaarneqartariaqanngilaq
Nunattalu tunngaviusumik inatsisissaani danskit tunngaviusumik inatsisaannut akerliusoqassappat, danskit akuerisariaqaraat Skaale isumaqarpoq.
Nunatta namminersornerulerneranut isumaqatigiissut danskit tunngaviusumik inatsisaannit pisinnaatitaaffeqartitsinerusoq Danmarkimit akuersissutigineqareersoq Sjúrður Skaalep aamma erseqqissaatigaa.
- Akerleriittoqannginnissaa aaqqissuussallu inatsisitigut akuersaarneqarnissaa savalimmiormiut naalagaaffeqatigiinni ilaasutut misigitinnissaat anguniarneqarsimavoq. Savalimmiormiummi kissaatigimmassuk atorfissaqartillugu taama aaqqiissuteqassaagut, Sjúrður Skaale oqarpoq.
