Pinngitsoorani soraarnerussutisiaqalernissamut siunnersuut KNAPK-mit ilalerneqarpoq
- Taanna tamakkiisumik ilalerparput, tamannalu tunngavigalugu artukkiinngitsumik aaqqissuussisoqarnissaanut piffissami tulliuttumi suliaqarnerput uagut qulakkeerniartussaavarput, Kalaallit Nunaanni Aalisartut Piniartullu Kattuffianni siulittaasoq Henrik Sandgreen oqarpoq.
Naalakkersuisut imminut pilersornerulersinnaanissaq anguniarlugu soraarnerussutisianut aaqqissuusseqqinnissamut siunnersuutaat Inatsisartut ukiakkut ataatsimiinneranni pingasunngormat oqallisigaat.
Aamma atuaruk Pinngitsoorani soraarnerussutissiaqalernissaq tapersersorluarneqarpoq
Utoqqalinersiaqalernissamut nammineerluni ileqqaarisalertoqarnissaq pillugu siunnersuut partiinit tamanit taperserneqaqaaq.
Soraarnerussutisianut aaqqissuussamik peqanngereersut ileqqaartalissapput, tamannalu piffissanngortoq Henrik Sandgreen isumaqarpoq.
- Matumani aallartiffeqartariaqarpugut, taannalu neriuutigilluinnarparput imatut isikkoqalissanngitsoq; allaat immaqa piviusunngortinneqarniarnera aamma ukiuni tulliuttuni qulini kinguarsarneqaqqilluni. Taanna pinngitsoorniarlugu aallartiffeqartariaqarpoq.
Aningaasarsiat nikerartartut
Aalisakkat akiisa nikerarnerujussuanik aningaasat isertinneqartut nikerartorujussuusinnaammata, aalisartunut immikkut aaqqiissuteqarnissamut kissaateqarnerat tunngaviusoq, siulittaasoq erseqqissaavoq.
- Imaalissanngimmat akitsuutinik eqqussuinerup qaavatigut aalisagaq ataaseq akimigut inissisimagissaarnera tunngavigalugu, aalisartut allat ilaatigut nammassinnaasaannik, artukkissannginnatsigit, minnerunngitsumillu angallataatillit, KNAPK-mi siulittaasoq Henrik Sandgreen taama oqarpoq.
Inatsisissatut siunnersuut aappassaaneerlugu oqaluuserineqassaaq oktoberip ulluisa 20-anni, soorlu aamma KNAPK tusarniaaffigineqarumaartoq.