Camp Century Sooruna Kalaallit Nunaat ilisimatinneqanngitsoq?
Kalaallillu ilisimatinneqarsimannginnerat akuerineqarsinnaanngitsoq, Nunanut Allanut Sillimaniarnermullu Ataatsimiititaliami ilaasortat oqarput.
- Isertuussaqarsimappata taama ittumik, Nunatsinnut tunngasumik, akueriuminaattorujussuuvoq, Nunanut Allanut Sillimaniarnermullu Ataatsimiititaliami siulittaasoq, Inuit Ataqatigiinneersorlu, Ane Hansen, oqarpoq.
AAMMA ATUARUK Atomip eqqagassartaanik sermersuarmut inissiinissaq Danmarkip akuerisimavaa
Amerikamiut imermik qinngulanernik ulorianartumik akulimmik nunaminnut assartuerusunnatik, sermersuup iluanut toqqaannartumik kuutsitsisarnissamik Danmarkimut 1960-imi qinnuteqarput. Tamanna danskit Naalakkersuisuisa akueraat, allagaatinilu atuarneqarsinnaavoq USA 1960-imiit ukiut sisamat sermersuup iluanut kuutsitsisarsimasoq.
Nunatsinnilu Landsrådi akuersissuteqartoqarneranik ilisimatinneqanngilaq.
- Kalaallit minnerpaamik isumasiorneqarsimasariaqaraluarput ilisimatinneqarlutillu. Kisianni taamaattoqarsimanngippat, nassuiaasoqartariaqarpoq tamanna qanoq pisinnaanersoq.
AAMMA ATUARUK Camp Centurymi saliinissaq professorip mianersoqqussutigigaa
Ataatsimiititaliami ilaasortaqataata, Demokraatinersup Justus Hansenip landsrådi ilisimatinneqarsimannginera aamma eqqarsarnartoqartippaa.
- Eqqarsarnarpoq. Kisianni tupaallannartoqartinngilara, Danmarkimmi nunanut allanut tunngasunut ministereqarfiata taamanikkut tamakkiisumik tigummivaa, taamaakkaluartoq landsrådi aperineqarsimasussaagaluarpoq, Justus Hansen oqarpoq.
AAMMA ATUARUK Killiliussat Roskildep kangerluanut aniatitsinissamut killiliussanit sakkortunerusut
- Pisoq una ersarissumik tamaat qulaajarneqartariaqarpoq, ataatsimiititaliami ilaasortaq Siumumeersorlu Vivian Motzfeldt oqarpoq.
Taamaammat nunanut allanut tunngasunut naalakkersuisup ilisimasani pillugit nassuiaateqarnissaminik ataatsimiititaliamit qaaqquneqassaaq, piumasarineqartussallu makkuupput:
- Salitassat assigiinngitsut salinneqarluinnaqqissaarnissaat piumasarissavarput aamma soorunalimi Nunatta sinnerani amerikamiut sakkutooqarfigisimasaasa eqqagassartaasa salinneqarnissaanik ukiorpassuarni utaqqineqartut ilanngullugit, Nunanut Allanut Sillimaniarnermullu Ataatsimiititaliami siulittaasoq, Inuit Ataqatigiinneersorlu, Ane Hansen, taama oqarpoq.