Espersen: Sooruna Julianehåb Jakobshavnilu atorneqarunnaartut?
Julianehåb, Jakobshavn, Scoresbysund. Nunatsinni illoqarfiitt nunaqarfiillu aqqi kalaallisoortut Danmarkimi allagaatini pisortatigoortuni atorneqarnissaannik qanga akuersissuteqartoqarsimanersoq Søren Espersenip ministeriunermut Lars Løkke Rasmussenimut apeqqutigaa.
Apeqquteqaammi Folketingimi Kalaallit Nunaannut tunngasunut ataatsimiititaliami siulittaasup Aleqa Hammondip Ministeriuneqarfimmut nassiussimasaani tamanna atuarneqarsinnaavoq.
- Kalaallit Nunaanni nunat aqqi danskisoortut pisortatigoortumik atorneqarunnaavissimanerinut suna tunngavilersuutigineqarsimanersoq, aammalu tamatumunnga Folketingimi qanga akuersissutigineqarsimanersoq ministeriunerup ilisimatitsissutigisinnaavaa?, Kalaallit Nunaannut tunngasunut ataatsimiititaliaq Espersen sinnerlugu taama apeqquteqarpoq.
Søren Espersen KNR-imit sianerfigaarput, nunat aqqi kalaallisoortut danskit allagaataanni pisortatigoortuni atorneqarnerat ajornartorsiutitut isigineraa paasiumallugu.
- Tamatta namminerisatsinnik taaguuteqartitsivugut, soorunami aamma kalaallit. Nunalli aqqi danskisoortut danskit kulturiannut ilaalluinnarput, aamma qanga illoqarfeqalinngikkallarmat nunaqarfeqalinngikkallarmallu sumiiffiit inunnut tunngaviilisimasunut atsiunneqartarsimapput.
Søren Espersenip, Dansk Folkepartiimi aamma Nunatsinnut tunngasunut oqaaseqartartuusup aamma oqaatigaa Kalaallit Nunaanni nunat aqqi ataqqilluinnarlugit:
- Kalaallit Nunaanni naalakkersuisut namminneq aalajangersaasussaapput, taamaaliortarnerallu paasisinnaalluarsinnaavara. Danskilli kulturiannut taama soqutiginaateqartigisut tammaannarsimanerat takusinnaallugu uatsinnut immikkut illuinnartuuvoq, tamannami Folketingimi naalakkersuisutigoortumilluunniit oqaluuserineqaranilu oqallisigineqarani pisimammat.
Danmarkimi maanna periaaserineqalersimasumut nassuiaatissaqarluaraluarpalluunniit, Espersen isumaqarpoq Kalaallit Nunaanni illoqarfinnut, nunaqarfinnut asimioqarfinnullu taaguutit danskisoortut Danmarkimi pisortatigoortumik atorneqartariaqartut.
- Kalaallit sumiiffinnut taaguutaat Danmarkimi pisortatigoortumik atulissagaluarutsigut tamanna kanngunarluinnassaaq, taaguusersuisarnitsinnummi kulturimik pigisaqareeratta.
Naalagaaffeqatigiinni suleqatigisamut ataqqinninniarluni kalaallit taaguutaannik atuinissamik aalajangiisoqarsimasinnaava?
- Soormiuna oqaluuserineqarsimanngitsoq. Uanga tusagaqanngilanga aamma qanga taamatut pisoqarsimanera ilisimaneqarunanngilaq. Ataqqinninnermut attuumassuteqanngilaq. Flensborg ataqqisupilussuuara, kisianni tamanna piinnarlugu Flensburgimik taagornavianngilara. Isumaqarpunga kina taamaaliornissamik aalajangersimanersoq paasissallugu soqutiginartuusoq, Søren Espersen taama naggasiivoq.
