Socialdemokraatit suleqatigiissitap siunnersuutissaa utaqqimaaqqaarusuppaat
KØBENHAVN: Danskit naalagaaffiat Kalaallit Nunaanni aatsitassarsiorluni suliffissuaqarnermi suliniutinut tapersersuilluni aningaasaliissappat, tamanna Danmarkip Kalaallit Nunaatalu akornanni erseqqissumik isumaqatigiissutigineqaqqaartariaqarpoq.
Socialdemokraatit Kalaallit Nunaannut tunngasunut oqaaseqartartuat, Flemming Møller Mortensen, taama isumaqarpoq, ilaatigullu Danmarkimi akileraartartut aningaasalersugaannik danskit aningaasaliisarfittut aningaasaateqarfiliornissaannik isumassarsiaq "pitsaasutut" aammalu "aaqqiissutaasinnaasutut" taallugu.
Kalaallilli danskillu suleqatigiissitaat, aningaasaliinerit pillugit nunat marluusut qanoq suleqatigiissinnaanerinik maannakkorpiaq misissuisoq, qanoq angusaqassanersoq utaqqimaaqqaarusullugu KNR-imut oqaatigaa.
- Kalaallit Nunaanni suliffissuaqarnermut suliffissaqartitsinermullu tunngatillugu iluaqutaasinnaasunik siunnersuuteqartoqarnera pitsaalluinnartutut isigaara. Tamannami pisariaqartinneqarluinnarpoq. Taamaammat aamma suleqatigiissitap matumunnga malinnaanissaa tusaatissatullu tigusinissaa naatsorsuutigilluinnarpara. Aammali oqaatigissavara aaqqiissutissat tamaasa pissanganartutut isigigakkit, Flemming Møller Mortensen oqarpoq.
Socialdemokraatit: Kalaallit Nunaat Danmarkilu isumaqatigiittariaqarput
Siunnersuuteqartoq tassaavoq suliffeqarfiup MT Højgaardip Nunatsinnut Savalimmiunullu pisortaa. Taassumalu siunnersuutigaa danskit naalakkersuisui aniningaasaateqarfimmut Kalaallit Nunaanni aatsitassarsiorluni suliffissuaqarnermut aqqutissiuisussamut 10 milliardit koruuninik aningaasaliissasut - Danmarkimilu inuussutissarsiutinik ingerlataqartut suleqataatinneqassasut.
Danskilli naalakkersuisuisa Kalaallit Nunaannut tunngasunut oqaaseqartartuat, naalagaaffiup aningaasalersugaanik Kalaallit Nunaannut iluaqutaasussamik aningaasaateqarfiliornissaq tapersersornerlugu oqaatigiumanngikkallarpaa. Suleqatigiissitap qanoq oqariartuuteqarnissaa apeqqutaatinnerarlugu.
- Aningaasaliissutit sumut atorneqarnissaat kalaallit danskillu isumaqatigiissutigilluinnartariaqarpaat. Politikkikkut aarlerinaateqarsinnaasumut soraarnerussutisiaqalernissamut ileqqaakka aningaasaliissutigerusunngilakka, Flemming Møller Mortensen oqarpoq nangillunilu:
- Imaanngilaq danskit naalagaaffiata karsia aningaasaateqartorujussuusoq, taamaammat illugiilluta aqqut suna atussanerlutigu isumaqatigiissutigilluinnartariaqarparput.
Dansk Folkeparti: Aatsitassanit iluanaarutit Danmarkip pissarsiaqarfigissavai
Søren Espersenip Dansk Folkepartiimeersup naalagaaffiup aningaasaliisarfittut aningaasaateqarfiliornissaa tapersersorpaa, Danmarkilli aatsitassarsiornermi isertitanit pissarsiaqarnissaa piumasaralugu. Namminersorneq pillugu inatsisip ammaqqinneratigut tamanna pisinnaavoq, taama oqarpoq.
- Aatsitassarsiorneq danskit naalagaaffiata aningaasaataanik tapersersorneqassappat Danmarkip iluanaarutinit pissarsinissaa tulluartuussaaq. Kalaallit Nunaat pissarsisinnarluni utertitseqqinngittuuinnarsinnaanngilaq. Taamaammat isumaqarpunga naalagaaffiup aningaasalersugaanik aningaasaateqarfiliortoqassappat, Kalaallit Nunaanni aatsitassarsiornermit isertitat pillugit namminersorneq pillugu inatsimmi aalajangersarneqartut qaqeqqinneqartariaqartut, Søren Espersen KNR-imut oqarpoq.
Namminersorneq pillugu inatsit malillugu, Kalaallit Nunaanni aatsitassarsiornermit isertitat tamaasa Nunatta karsiata pisussaavai.
