Small Time Giantsikkut USA-mi biilinik ajutoortut

Nipilersoqatigiit Small Time Giants-ikkut Austinimi Texasimiittumi biilinik ajutoorsimapput, qujanartumilli ajoquserujussuarsimanngillat. Nipilersoqatigiit Facebookiminni taama allaaserisaqarput.
Assi © : Small Time Giants/Mads Pihl
marsip 21-at 2017 15:50

- Pisoq eqqarsaatigissagaanni ajunngilagut kimillanneqalaaginnarlutalu, Small Time Giants Faacebookiminni allapput. 

Amerikamiut biiliannik angisuuni aquttoq qulleq angallannermi najoqqutassaq aappaluttuusoq sukkaqaluni ingerlaannarsimasoq, nipilersoqatigiit oqaluttuarput. 

Qujanartumilli Small Time Giantsikkut biiliminnit namminneq anillassinnaasimapput pisullutillu akunnittarfiliarsinnaasimallutik. 

Ajoratik aniguisimaarnertik nuannaarutigalugu allapput.