Siusissukkut iliuuseqartoqarnissaa MIO-p ujartoraa

Imminut toquttarnerup pinaveersaartinneqarnissaanut suliniuteqartoqaraluartoq, Nunatsinni inuusuttuaqqat 18-iliineqanngitsut imminut toquttartut ikileriarsimanngillat.

Peqqissutsimut naalakkersuisoq isumaqarpoq periusissiornerit atorneqartut kukkusuusimanngitsut. Oqaatigiuminaappormi suliniuteqartoqarsimanngikkaluarpat pissutsit qanoq isikkoqarsimanissaat.

- Pinaveersaartitsineq taanna pinngitsoorsinnaanngilarput aamma ingerlasariaqarpoq, soorunami nutarterisassaagut periutsillu assigiinngitsut atortassavagut. Aamma illuatungaatigut oqartoqarsinnaavoq, pinaveersaartitsilluta, paasititsiniaalluta periusersiorsimanngikkaluarutta imaassinnaavoq kisitsisit ullumikkut amerlanerujussuusimasinnaagaluartut, peqqissutsimut naalakkersuisoq Agathe Fontain oqarpoq.

Kingusinaarlutik iliuuseqarnialertartut

Meeqqat illersuisuata oqartussat ikiuiniartarat isornartorsiorpaa, ajutoorluinnarfimmimi aatsaat iliuuseqarniartoqartartoq, illersuisup maluginiarsimavaa. 

- Sooq inuusuttunnguaq aatsaat imminorniaruni aatsaat ikiorserniarneqalertartoq, Meeqqat illersuisuat Aviâja Egede Lynge oqarpoq.

Inuusuttuaqqat 18-it inorlugit ukiullit sisamat siorna imminut toqussimapput. Qulingiluallu imminut toqoriaraluarsimallutik.

Inuusuttuaqqat imminut toqussimasut toqoriaraluarsimasullu agguaqatigiisillugit 16-inik ukioqartut, Kalaallit Nunaanni politiit kisitsisaataasa takutippaat. 

Nunatsinni imminut toqussimasut imminullu toqoriaraluartut nalunaarsorneqarsimasut katillugit 109-upput, taakkunannga angutit amerlanerussuteqarlutik.

Paasititsiniaanerli naammanngitsoq pinaveersaartitsinerlu annertusarneqartariaqartoq, Meeqqat Illersuisuat isumaqarpoq. Iliuuseqarnerunikkummi kisitsisit taakku appasinnerusinnaasut, Aviâja Egede Lynge oqarpoq.

- Isumaqarpunga Nunatsinni taanna suleriaaseq ernumanartuusoq aamma kisitsisinik nikisitsingaarnavianngitsoq, ilumut ikiugassaatillugit ikiortalinngikkutsigit.

Pikkorissaalersut

Imminornissamik eqqarsaatillit siusissukkut tappiffiginerunissaat anguniarlugu, meeqqanut inuusuttuaqqanullu sullissisut ukioq manna martsimi pikkorissartinneqassapput. Tamanna siammasissumik pissasoq, peqqissutsimut naalakkersuisoq oqarpoq.