Siusinaartumik pensionisialinnut piumasaqaatit sukannernerusut
Sulisinnaassuseqartut tamarmik sulissapput. Inatsisissatullu siunnersuummi Inatsisartuni ilaasortat ullumi siullermiigassaanni, siusinaartumik pensionisiaqarnissaq qajassuuttariaqartumut suliffeqarnermut eqaannerusumillu suliffeqarnermut naleqqiullugu orniginannginnerulersinneqassaaq.
Aaqqissuusseqqinnermi siornatigumut allaanerussutaasut ilaat tassaavoq, kingusinnerpaamik ukiut tallimat ingerlareernerini sulisinnaassusermik tamanut atuuttussamik nalilersuisoqartarnissaa. Inatsisissatut siunnersuutip oqaasertaani allassimavoq, innuttaasut nukissaqarfigisaat ineriartornerallu annerusumik isiginiarneqartalissasut.
"Taamaaliornikkut innuttaasut siusinaartumik pensionisiallit suliffissaqarnermut attuumassuteqaratik ilatsiinnarlutik inissinnissaraluat pinngitsoortinneqassaaq", taama oqaasertaqarpoq.
Innuttaasut amerlanerit pisortanit ikiorsiissutinik isumalluuteqaratik suliffeqarnissaat pilerinarsarniarlugu, Naalakkersuisut aamma aningaasatigut suliniuteqarniarput. Innuttaasut sulisinnaassuseqanngilluinnartut maannamut naleqqiullugu pitsaanerusunik atugassaqartinnissaat aaqqissuusseqqinnermi aamma siunertarineqarpoq.
