Aalisarneq pillugu inatsit Siunnersuut tapersersoraluarlugu ernumasut paasisinnaagai

Aalisarneq pillugu inatsimmut allannguutissatut siunnersuummut ernumasut Inatsisartut aalisarnermut piniarnermullu ataatsimiititaliap siulittaasuata, Inuit Ataqatigiinneersup, Hans Aronsenip paasisinnaavai. Aalisarnerli amerlanerusunut iluaqutaasariaqarsoraa.

- Aalisarnerup siammarterneqarnera pitsaasutut isigaarput, aamma taamaattariaqarluinnartutut nalilerparput, Hans Aronsen oqarpoq.

Siunnersuut maannatut isikkoqartillugu akuerineqassappat nunatta karsiata ukiumut 130 millionit koruunit annaasalersinnaavai inuussutissarsiuteqarnermillu ingerlatsisut naalagaaffimmi tunisat ataatsimut nalingat naatsorsoraanni ukiumut 180 millionit annaasinnaallugit.

Nunattalu karsia aalisarnermit ikinnerusunik isertitaqartalissasoq Hans Aronsenip nalunngilaa.

AAMMA ATUARUK Aalisarneq pillugu inatsisissatut siunnersuut akisusinnaasoq

Inatsilli akuerineqarpat allannguuteqareersimanissaa taassuma ilimagaa.

Aalisarnerullu inunnit amerlanerusunit inuussutissarsiutigineqarnissaata nunattalu aningaasaqarneranut isertitsissutaanissaata oqimaaqatigiissaarluarnissaat pingaartoq, Hans Aronsen isumaqarpoq.

- Una aalisarnermut inatsit inuiaqatigiinnut naleqartitatigut, kiisalu aamma aningaasaqarnikkut, nunatta karsianut, pitsaanerpaamik angusaqarfiunissaa sulissutigineqassasoq qularutigineqassanngilaq, Hans Aronsen oqarpoq.

AAMMA ATUARUK Siunnersuut akisussaassuseqanngitsuliorneruvoq

Naalakkersuisulli siunnersuutaat ernumassutigineqarpoq. Ilaatigut siunnersuut suliarilluagaanngitsoq, taassumalu nunarput piitsuunerulersissagaa, sulisitsisut peqatigiiffiat isornartorsiuivoq.

Hans Aronsenillu ernumassutit paasisinnaavai.

- Uani allannguinissami kikkut tamarmik peqataanissaat, aamma nutaamik aaqqissuusseqqinnissat assigiinngitsut, pinngitsooratik pisussaapput, Inatsisartut aalisarnermut piniarnermullu ataatsimiititaliaanni siulittaasoq, Inuit Ataqatigiinneersoq, Hans Aronsen oqarpoq.

Soqutigisaqaqatigiiffiillu inuit amerlanerit aalisarnermik inuussutissarsiuteqarsinnaanissaannut suleqataanissaannik kaammattorlugit.

AAMMA ATUARUK Siunnersuut qularnerulersitsisinnaasunik imaqartoq