Qinersisinnaatitaaneq: Siunnersuut eqqunngitsumik tunngavilersorneqartoq

Danmarkimit Savalimmiuniillu suliartortitat nunatsinnut sunniuteqarsinnaavallaartut, Siumup Inatsisartuni gruppia isumaqarpoq.

Taamaammat nunanit taakkunanngaanneersut ukiut marluk arfineq-marlullu akornanni najugaqaqqaarlutik Inatsisartunut qinersisinnaatitaalertariaqartut, partii isumaqarpoq.

Tikisitalli qinersigaangata inuiaqatigiinnut qanoqqissaaq kinguneqartarnersoq, Siumup Inatsisartuni gruppiata siulittaasuata, Jens Immanuelsenip oqaatigisinnaanngilaa.

Aamma kalaallit Danmarkimut nuuttut Folketingimut ingerlaannaq qinersisinnaatitaaneq ajortut, Immanuelsen nassuiaavoq. Tamannali eqqunngilaq.

AAMMA ATUARUK Siumut tikisitat taasisinnaatitaanerannik killiliiniartoq

- Ukiut marluk inorlugit nunatsinniittussaallutik qinersisimappata, iluamillu immaqa inuiaqatigiit ingerlaasiannut pulaqqaarnatik, taava inuiaqatigiit katitigaanerannut, qinikkat inissittarnerannut, taakkua sunniuteqarput, tikisitat sivisunerusumik nunatsinneeqqaarlutik qinersisinnaatitaalernissaat pillugu oqallinnissamik siunnersuut tunngavilersorlugu Jens Immanuelsen oqarpoq.

Immanuelsen: Kalaallit folketingimut sivisuumik qinersisinnaatitaanngitsut

Danskit savalimmiormiullu nunatsinni ukiup affaani najugaqareeraangamik Inatsisartunut qinersisinnaatitaalertarput.

Tamanna ukiunut marluk arfineq-marlullu akornannut sivitsortariaqartoq Siumut isumaqarpoq.

Immanuelsenilli siunnersuuteqarnermut tunngavilersuutaa alla eqqunngilaq. Kalaallit Danmarkimut nuuttut Folketingimut qinersiniarunik utaqqeqqaartariaqartut, Immanuelsen KNR-imut nassuiaavoq.

- Illit uangalu Danmarkimut pigutta, ukiut marluk arfineq-marlullu akornanni taasisinnaatitaanngilagut. Inuiaqatigiit ingerlataanerannut sunniuteqarsinnaatitaanngilagut. Illuatungaani nunatsinnut nunatsinni ukiup affaa najugaqaruit taasisinnaatitaavutit. Taamaattumik taanna pineqarpoq, apeqqummi, Jens Immanuelsen oqarpoq.

Immanuelsen: Qinersisarnerni qanoq sunniuteqartarnersut naluarput

Kisianni kalaallit Danmarkimi najugaqartutut nalunaarsorneqaleraangamik Folketingimut qinersisinnaalersartut, Kalaallit Nunaata Danmarkimi Sinniisoqarfia KNR-imut paasissutissiivoq.

Danmarkimimi najugaqartutut nalunaarsorneqarunik, taava danskisut innuttaassuseqarnermik Danmarkimilu aalajangersimasumik najugaqarnermik piumasaqaatit naammassisaarpaat.

Nunanit allaneersut tamarmik qinersisinnaatitaanerat killilerniarneqartoq, Jens Immanuelsenip erseqqissaatigaa. Siumulli siunnersuutaata tunngavilersuutaani allaqqavoq, inuit ukiup affaa nunatsinneereerlutik qinersisinnaatitaalertartut uani pineqartut, taamaammat danskisut innuttaassuseqartut, tassalu danskit savalimmiormiullu kisimik pineqarsinnaapput.

Taakkulu sivikitsumik nunatsinneereerlutik qinersigaangata inuiaqatigiinnut qanoqqissaaq kinguneqartarnersoq, Immanuelsenip oqaatigisinnaanngilaa.

- Naluarput, tikisitat qanoq qinersisarnerni sunniuteqartarnersut. Kisianni una ilisimavarput: piffissaq sivikitsunnguaq nunatsinneeriarlutik inuiaqatigiit aaqqissuussaanerannut taasinermikkut sunniuteqaqataasarmata, Siumup Inatsisartuni gruppiata siulittaasua, Jens Immanuelsen oqarpoq.

Jens Immanuelsen kingorna attaveqarfigeqqipparput, tamannali pillugu annerusumik oqaaseqarusunngilaq.