Ataatsimeersuartut: Siunissami takorniarialerisarnissaq sukumiisumik piareersarneqarli
Takornariaqarneq pillugu ataatsimeersuarnerit maannamut annersaanni, Towards more Tourismimi peqataasut 130-t Nuummi maanna katersuussimalerput.
Kalaallit Nunaannimi siunissami takornariaqarnerulersinnaasoq ataatsimeersuarnermi aaqqissuussisut marluk, Visit Greenland Air Greenlandilu, isumaqarput. Taamaammallu Kalaallit Nunaata takornariaqarfissuanngornissaminut piareersarluarnissaa pingaaruteqartorujussuuvoq. Tamannalu iliuusissatut pilersaarusiornikkut, assigiimmik anguniagaqarluni suliarineqassasoq, Air Greenlandimi niuernermut pisortaq, Maliina Abelsen isumaqarpoq.
- Takornariartitsisarnerup qanoq iliornikkut imminut napatittunngortinnissaa qanorlu tamatuma tuniniarusutatsitut, tassa pinngortitatut, minguitsutut immikkuullarissutullu tipeqarnissaatut, ittuutinnissaa isumaliutigissallugu pingaarpoq. Tassalu tamanna iliuusissatut pilersaarusiuutassaavoq, Abelsen oqarpoq.
AAMMA ATUARUK Sermersuumi takornarialerinermi iliuusissaq nutaaq
Takornariat aningaasanik kaasarfimmiuliinnaat
Visit Greenland iliuusissatut pilersaarummik erseqqissumik aamma kissaateqarpoq, pisortalli, Julie Parsip, takornariat tikittut amerlinissaat kisiat piareersarusunngilaa - takornariat kikkut tikittarnissaat aamma aqutseqataaffigerusuppaa, taamaaliornikkut assersuutigalugu Barcelonamitulli takornariarpassuaqalissanngitsoq, Julie Pars nassuiaavoq.
- Taamaammat kikkut tikittarnissaasa pilersaarusiorluaqqissaarnissaa pingaaruteqarpoq taakkulu nunatsinni nioqqutissaatitsinnik akiliisinnaasuusariaqarput. Kaasarfimminni aningaasaateqassapput taakkulu nunatsinnut takornariaqarnermillu suliaqartunut iluanaaruteqartitsissallutik, Julie Pars oqarpoq.
AAMMA ATUARUK Ilulissani takornarialerisut silamit eqqornerlunneqartut
Takornariaqartitsinermik sinnattuanerput ilumut piviusunngussanersoq ilaasa immaqa takoqqaarlugu amerlasuunik aningaasaleerusussapput. Taamatulli iliuusissatut pilersaarusiorneq kukkunerussasoq ataatsimeersuarnermi oqalugiartuni pingaarneq, Natasha Martin isumaqarpoq.
Taassuma nunani assigiinngitsuni takornarianut pilerinarsaanissaq ukiorpassuarni misilittagaqarfigaa, nunatsinnullu angalasoqartalernissaa pingaartumik takornarianut misigisassarsiortunut tunngatillugu siunissagissaarsoraa. Taamaakkaluartorli mianersoqqussuteqarpoq:
- Orninneqartartorpassuit takornarianit ueqqivigineqarnissartik naatsorsuutiginngisaannartarpaat, taamali nunarsuaq tamakkerlugu pisoqartuaannarpoq, Kalaallit Nunaatalu allat misilittagaat ilinniarfigissallugit maanna periarfissaraa takornariartitsinerullu kalaallit piumasaattut iluseqalernissaa piareersarsinnaallugu, Natasha Martin oqarpoq.
AAMMA ATUARUK Kangerlussuarmi umiarsualivik takornarianut iluaqutaassaaq
Ataatsimeersuarneq siunissami takornariaqarnermut tunngatillugu qulinik innersuussuteqarnermik inerneqassaaq, taakkulu aaqqissuisut nunatsinni aalajangiisartunut nassiutissavaat.