Siunissami silap pissusissaa sermersuup nakkutigineqarneranit siulittorneqartoq
GEUS-ip Danmarkimut nunatsinnillu misissuisartup Sermersuarmi nakkutilliineq ukiut qulit matuma siorna aallartippaa.
Tamanna Sermersuup sinaani misissuisarfinnit 14-init ilisimatuullu misissuisarfiini arfinilinni programmi PROMICE atorlugu nakkutigineqarpoq, tassani kiassuseq, anori sikullu aakkiartornera ilaatigut uuttortarneqartarput.
Uuttuinerillu silap pissusiata allanngoriartornerpaaffigisaanniillutik nunatsinniinnerat pingaartuusoq, immikkoortortaqarfiup pisortaata, GEUS-imilu naalagaaffiup geologiata, Signe Bech Andersenip KNR-imut oqaatigaa.
- Kalaallit Nunaanni Sermersuaq silap pissusiata ataatsimut qanoq inneranut pingaaruteqartorujussuuvoq. Saniatigullu Kalaallit Nunaanni silap pissusiata allanngoriartungaatsiarnerani sikup qanoq aakkiartortiginerata uuttornissaa pingaaruteqarpoq.
AAMMA ATUARUK Sermersuarmi juulimi kiannerpaaffiusoq nillernerpaaffiusorlu qaangerneqartut
Nunarsuup silap pissusiata allanngoriartorneranut paasissutissat amigaatigai
Nunarsuatsinni silap pissusiata allanngoriartorneranut ilisimatuutut tamatumalu sumik peqquteqarneranut paasissutissat amigaataanerat pillugit Naalagaaffiit Peqatigiit sila pillugu ataatsimiittartoqartigiivisa Issittumi Siunnersuisoqatigiillu 2007-imi erseqqissaatigereermassuk nakkutilliineq aallartinneqarpoq.
Tamannalu GEUS-ip Sermersuumi nakkutilliineranut aallarniutaavoq. PROMICE-mik uuttortaanerit ukiuni quliinnarni maanna ingerlanneqarsimagaluartut ukiut taakku nalinginnaanngingaatsiarsimasut, Signe Bech Andersen oqarpoq.
AAMMA ATUARUK Aasaanerani sermersuarmi atuartut
- Siku 2010-mi 2012-imilu ukiup ilaani 9 meterinik ammukajaaq aattoq misissuisarfitsinnit (Sermersuarmi aaqq.) takuneqarsinnaasimavoq. Saniatigullu Kalaallit Nunaanni Sermersuarmi tamarmi issangertoq qaammataasiatsinnit takuneqarsinnaalluni.
Tamanna siusinnerusukkut pisimanngitsoq ilisimatuut kiassutsimik ilaatigut siusinnerusukkut uuttuinertigut nalilersinnaavaat.
- Piffissami tassani uuttuinitsinni aakkiartungaatsiarsimavoq, naalagaaffiup geologia oqarpoq.
Nakkutilliineq silap pissusiata allanngoriartorneranik takussutissiisinnaavoq
Sermersuarmi nakkutilliineq timmisartunit uuttortaanernit pingaartumik qaammataasiamit paasissutissanit amerliartuinnartunit taperserneqartarpoq.
EU europamiut avataarsualiartitsisarfiat ESA aqqutigalugu 2012-imi qaammataasiatigut ilaatigut silap pissusianik nakkutilliissutaasussanut 75. Mio. koruunit missaannik aningaasaliivoq.
AAMMA ATUARUK Silap pissusiata allanngoriartornera takornariaqarnermut iluaqutaasinnaasoq
PROMICE-mit paasissutissat nunarsuarmi kikkunnit tamanit programmip nittartagaatigut takuneqarsinnaatitaapput. Tassanilu paasissutissat nunat tamalaat akornanni suleqatiginnit ministeriniillu atorneqartarput.
Paasissutissallu taakku assersuutigalugu sermip aakkiartorneranut nunarsuarmilu immat qaffakkiartorneranut innuttaasut naleqqussarnissaannut siunissami pingaaruteqaleraluttuinnarsinnaapput.
- Silap pissusiata siunissami qanoq innissaata siulittorsinnaalluarnera naleqqussarnissamut pingaaruteqartorujussuuvoq. Tassani Kalaallit Nunaanni nujaqarfinni nunarsuarmilu immap qaffasissusaanut aammali imarpiit kaaviiaarnerannut tamanna pingaaruteqarpoq, Signe Bech Andersen oqarpoq.
