Siumut Sisimiut isornartorsiorneqarnermut qisuariartoq

Kaaleeraq Møller Andersenip Siumut Sisimiuni pissaaneqarniuunnerup aqqani siulittaasutut tunuarsimaluni sisamanngornermi KNR-imut oqaatigaa. Maannalu Siumut Sisimiut akissuteqarpoq.
Allattoq Mads Pedersen
juunip 23-at 2017 14:45

Kaaleeraq Møller Andersen Siumut Sisimiuni qaammatini marlunni siulittaasooreerluni tunuarpoq. Taanna ilinniakkaminik naammassinnereerluni Uummannamut uterniarni tunuarnerminut ilaatigut tunngavilersuutigaa. 

Møller Andersenilli KNR oqaatigaa ”utoqqaat partiiat” qatsussimallugu, pissaaneqarniuunnerullu aqqani tunuartariaqarsimalluni. Taassuma Siumut siulittaasuanut Kim Kielsenimut tapersersuisuunnginnini pillugu Siumut Sisimiuni siulersuisuinit uppisitaanissani qularisimanngilaa, tamannalu pitinnagu tunuarluni. 

AAMMA ATUARUK Jeg er træt af de gamle i vores parti

Maanna Siumup immikkoortortaqarfia, siulittaasuugallartoq Dorthea Isaksen siuttoralugu, qisuariarpoq. Kaaleeraq Møller Andersen imminut sullittutut pingasuinnarnillu anguniagaqartutut immikkoortortaqarfimmit isornartorsiorneqarpoq. 

- Siullertut Siumut nuna tamakkerslugu ataatsimeersuarnissaanut aallartitatut peqataanissani anguniarpaa. Aappaattut Siumut siulersuisuunerini ilaasortaalernissani siunertaralugu. Pingajuattullu siulittaasutut inissisimanini Inatsisartunik qinersinissap tullianut piareersarfittut atorniarlugu, Dorthea Isaksen allappoq. 

Aaqqiissut ataavartoq ujartorneqartoq

Taanna isumaqarpoq Kaaleeraq Møller Andersenip qaammatini marluinnarni siulittaasuunissaminik siunertaqarnini pillugu unneqaarissimanngitsoq. 

- Partiitta siulittaasuanik apeqqusiineranut tunnganngilaq. Tunngaviusorli tassaavoq Siumut Sisimiut siulittaasumik akisussaassusilimmik qinigaaffik naallugu siulittaasuusussamik pisariaqartitsinera, Dorthea Isaksen allappoq.

AAMMA ATUARUK Sommerferie gav plads til evakuerede

Kaaleeraq Møller Andersenip tunuarnermini oqaatigaa ”utoqqaat partiiat” qatsussimallugu utoqqaallu ataqqinninnatik namminneq isummatik kisiisa malinniartaraat oqaatigalugu. Tassungalu Siumut Sisimiut ima akivoq: 

- Inuusuttut nunatta pisariaqartippai aamma isummersortissallugit pisariaqartittuaannarpai, aammali nunatsinni utoqqartatta misilittagaat pisariaqartippagut. 

Isaksenip erseqqissaatigaa Kaalleraq Møller Andersenip Siumut Sisimiuni siulittaasunngornera tulluusimaarutaasimaqisoq. Paasineqarmalli ilinniakkaminik naammassinnereerluni siulittaasutut tunuarniartoq pakatsineq angisimaqisoq.

AAMMA ATUARUK Kilisaammi inuttat 13-it eqqartuussivimmi nassuiaateqassasut

AAMMA ATUARUK RAL-imi sulisut ullut pingajussaanik suliumajunnaaqqasut