ISUMASIUINEQ Siumut Nunatsinni partiit anginersarileqqikkaat
HS-Analysep inuit 1003-t, ulluni novembarip 21-ianit 23-anut aperisimavai tallimanngorpat kikkunnik qinersiniarnersut.
Qinersisartunillu isumasiuinerup matuma takuteqqippaa Siumut siuariartoq IA-lu ukiormanna isumasiuinerit siuliinut naleqqiullugu kinguariartuinnartoq.
HS-Analysep isumasiuinera malillugu, Siumut partiit anginersareqqilerpaat qinersisartut 36,7 procentiinit qinerneqassalluni IA 34,5 procentinit qinerneqarniartoq.
Inatsisartunut ilaasortaatitassanut tunngatillugu, Siumut aqqaneq-marlunnik ilaasortaatitaqalissaaq - qinersinermut kingullermut naleqqiullugu marlunnik ikinnerusunik, IA-lu marsimi 2013-imi qinersinermut naleqqiullugu ilaasortaatitani aqqanillit pigiinnassavai.
AAMMA ATUARUK IA isumasiuinermi nutaami aamma siuariartussatut isikkoqartoq
HS-Analyselli isumasiuinera nutaaq, aviisimi AG-mi atuarneqarsinnaasoq, partiit mikinerit sisamaasut novembarip 28-ata kingorna kikkut Naalakkersuisunngortitsisinnaanerannut sunniuteqarsinnaanerannik allanngortitsinngilaq.
Demokraatit siuariartortuarsinnarput, 11,2 procentinit qinerneqassallutik - tassalu pingasunik ilaasortaatitaqalissapput - qinersinermut kingullermut naleqqiullugu ilaasortaatitaat ataatsimik ilassallutik.
Partii Naleraq 10,2 procentinik pissarsissangatinneqarpoq - Hans Enoksenip parteertaava taamaasilluni ullumikkut qinersisoqartuuppat pingasunik ilaasortaatitaqalissagaluarluni.
Atassutip 6,0 procentit pissarsiarai, qinersinermut kingullermut naleqqiullugu 2,2 procentinik kinguariarluni, Inatsisartunili ilaasortaatitani marluk pigiinnassavai, Partii Inuilli Inatsisartuni ilaasortaatitatik annaasussanngorpasippaat - HS-Analysep isumasiuinera naapertorlugu 1,4 procentinit qinerneqassallutik.
AAMMA ATUARUK IA partiit anginersarilissavaat
Qinersisartunik isumasiuineq sapaatit-akunnerata naanerani ingerlanneqarpoq, tassalu Kim Kielsenip Sara Olsvigillu ataasinngormat tv-kkut oqallitsinneqarnerat sioqqullugu.
Qinersisartut 15 procentii kikkunnik qinersissanerlutik suli aalajangersimanngillat, taamaalilluni qinersinissamut atatillugu ulluni kingullerni oqallinnerit qinersinerup inernissaanut pingaaruteqarluinnarsinnaapput - takkununnga ilaalluni partiit siulittaasuisa naggataarutaasumik sisamanngorpat unnukkut tv-kkut radiukkullu toqqaannartumik oqallitsinnearnissaat.
Isumasiuinerup inernera tamakkerlugu AG-mi ullumi saqqummersumi atuarneqarsinnaavoq, taannalu qinersinissamut atatillugu akeqanngitsumik agguaanneqarpoq - taamaammat nunguussaannginninni pisiniarfimmut aviisimik aallipallakkina.
