Siumut: Meeqqanut siunnersuisoqatigeeqalissaaq

Meeqqat kaattut pillugit oqallinneq qaangiuteriikatattoq qineqqusaarutaat quppersaganngorlutik saqqummerput, Naalakkersuisunut illuatungiliuttut Demokraatit aamma Inuit Ataqatigiit qineqqusaarutaat qangali saqqummereersut.

Siumup ilaqutariit meerartallit salliutillugit suliniarfigineqalernissaat pingaarnerpaasoraa.

Illuatungiliuttut ilaat Demokraatit inatsisartunut qinersinissaq sioqqullugu marsip qulingiluaanili meeqqanut tunngatillugu suliniutissat 83 millionit koruuninik naleqartussat saqqummiuppaat, tassaasut meeqqat atuarfiini atuartut tamarmik nerisaqalernissaat, illoqarfinni tamani ilaqutariinnut tapersersorteqalernissat, børneombudsmandeqalernissaq, illoqarfinnilu tamani meeqqat ornittagaqalernissaat siunnersuutigaat, taakkulu tamarmik meeqqap aningaaserivinni ileqqaartinneqalernerannit aamma puisit amiinut tapiissutit affaannanngortinnerisigut aningaasalersorneqassasut, Demokraatit siunnersuutigaat.

Inuit Ataqatigiit aamma meeqqat kaatsinnissaat pinaveersaarniarlugu suliniuteqaqatigiittussanik pilersitsinissaq anguniarpaat, kinguaassiuutitigut atornerlunneqarsimasut tapersersorneqartarfiannik pilersitsinissaq aamma meeqqat aningaaserivinni ileqqaartinneqarnerat unitsissasoq siunnersuutigaat, taarsiullugu aningaasat meeqqat atuarfiini nerisitsisalernernut atorneqassasut siunnersuutigalugu.

Siumut saqqummersitamini suliniutissanik pingasuinnarnik siunnersuuteqarpoq.

Siumup qineqqusaarutaani AG-mut ilanngullugu ullumi saqqummersut ilaatigut ima oqariartuuteqarput:

- Inatsisartut, Naalakkersuisut kommunillu ukiuni tulliuttuni suliniutissat piviusunngortinnissaannut suleriaasissaminnut pilersaarusiussapput siunertanullu aningaasaliissuteqartarnissaq qulakkiissallugu. Piviusunngortitassamissullu pingasunik taasaqarput, tassaasunik meeqqat pisinnaatitaaffii pillugit paasisitsiniaanissaq, Peqatigiiffimmik Meeqqat Inuunerissunik qanimut suleqateqarnissaq aamma ilaqutariinnut meeqqanullu siunnersuisoqatigiinnik pilersitsinissaq.

Kingulleq Siumup nammineq Dermokraatit 2007-imi siunnersuutigimmassuk itigartippaat. Inatsisartuni Ilaqutariissutsimut ataatsimiititaliami siulittaasuugallartoq Isak Davidsen qineqqusaarutit pillugit ima oqarpoq.

- Itigartitsinikuuvugut, kisianni uagut allatut ilusilerlugu saqqummiunniarparput, pissutigalugu ukiuni makkunani atukkanik naleqqunnerusumik ingerlatsisariaqaratta. Meeqqanik kaattunik oqalunnerit nunatsinni annertoorujussuarmik puupassaarinikuupput, kisiannilu pisussaviusut tassani taaneqaratik. Isak Davidsen oqarpoq.

Angajoqqaat meeqqaminnik perorsaasussaanerarpai, taamaammallu meerartallit pillugit suleqatigiiffimmik aallartitsinialersaarput. Sumilli aningaasalersorneqassappat?

- Nunatsinni sanaartorneq nukissiorfiliortiterneq taavalu mittarfiliortiterneq allallu sanaartugassat angusuut nunatta avataani aningaasalersorlugit ingerlanniarpagut. Kisianni aningaasat nunatta karsianit tiguniarpavut. Nunatta avataanit allat aningaasalersorutsigut, sullissagut amerlanerussagamik, oqarpoq.

Taamaammat aamma siunnersuutit pingasuinnaanerat ikiginannginnerarpaa.

- Siunnersuutit eqqarsaatigineqarluarunik imarparujussuarnik ulikkaarput. Oqartoqarsinnaasorinngilara naammanngitsut, Isak Davidsen oqarpoq.

- Siunnersuutit iluanni annertoorujussuarmik suliassartaqarput. Piviusunngortinnissaat siunertaralugu Siumut suliniarniarpoq, aap, piviusunngussapput, Isak Davidsen oqarpoq.