Siumut: Kommunerujussuit naliliiffigineqarlik

Kommunerujussuanngortitsinerup kingorna ilaatigut illoqarfinni mikinerni, nunaqarfinnilu innuttaasut oqartussanut attaveqarnerat unammillernarnerulersimasoq, Siummumit isumaqartoqarpoq.

Oqartussallu ilungersorlutik suligaluarlutik innuttaasut naammaginninngitsut, Siumup Inatsisartuni gruppiata siulittaasua Jens Immanuelsen oqarpoq.

- Isertorneqarsinnaanngilaq kommunalbestyrelsemut ilaasortaq aperigaanni, qanoq ingerlavisi, akissaaq pitsaasumik ajunngitsumillu ingerlavugut. Kisianni innuttaasut aperigaanni, kommuniminngaanniit sullinneqarnersi qanoq igaasiuk, akissapput naammaginngilluinnarlugu, Jens Immanuelsen oqarpoq.

Innuttaasut qanimut oqartussaaqataanerat sullinneqarnerallu kommunerujussuanngortitsinerup kingorna ajorseriarsimasut, avinngarusimanerusunilu innuttaasut ingammik eqqorneqartut, Jens Immanuelsenip erseqqissaatigaa.

- Kommunip nunaqarfinni allaffii ullumikkut saaffiginnittarfiinnaapput, aalajangiisinnaatitaanermut soqanngitsut. Taava nunaqarfinni saaffiginnissutsit illoqarfimmut saaffiginnissutigineqaraangata, taakkunanngaanniit aamma qitiusoqarfimmut aalajangiiffigineqarniassammata ingerlateqqinneqartarput. Tassani takuneqarsinnaavoq, aqqut sivisuallaartoq,taavalu aamma  sullinneqartup pisariaqartitsineranut qaangiuttoorujussuarluni aalajangiineq pisinnaasartoq, Jens Immanuelsen oqarpoq.

Innuttaasullu sullinneqarnerat pitsaallisinniarlugu qanoq iliortoqarnissaanik paasiniassalluni maannakkut piffissanngortoq, Jens Immanuelsen isumaqarpoq.

Taamaammat kommunerujussuanngortitsinerup naliliiffigineqarnissaa maannakkut piffissanngortoq, Siumup Inatsisartuni gruppiata kissaatigaa, kommunit maannakkutut ingerlaannassanersut allatulluunniit aaqqissuussisoqassanersoq paasiniarlugu.

Taamatut isornartorsiuineq Jens Immanuelsenip parteeqataata, Qaasuitsup Kommunianilu kommunalbestyrelsimut ilaasortap, Bernhardt Olsenip paasisinnaavaa.

Taamaattoq Qaasuitsup Kommuniata avinneqannginnissaa siunissaq ungasinnerusoq eqqarsaatigalugu pitsaanerussasoq Olsen isumaqarpoq.

- Innuttaasut 33 procentii tunuliaqutaralugit Namminersorlutik Oqartussanut saaffiginnikkutta, isumaqatigiinnissarput isumalluarnarneruvoq, Bernhardt Olsen oqarpoq, komuninullu tapiissutit, sanaartugassallu, soorlu mittarfiit assersuutigalugit.

Kommunillu avinneqanngippat sulisugissaarnerunissaanut periarfissaginnerussasoq, taassuma aamma oqaatigaa.

- Allaffimmiut sulisut pikkorissut kommunerujummut atorfinitsinnissaat ajornannginnerussaaq, Bernhardt Olsen oqarpoq.