Siumut kinguariaateqaraluarluni suli annerpaajuarsinnarpoq

Siumut ippassaq kinguariaateqaraluarluni kommuninngortussani pingasuni partiini suli annerpaajuarsinnarpoq.
Allattoq Louise M. Kleemann
apriilip 09-at 2008 10:45

Kisianni Kangia-Kitaata kommunissaani partii annerpaamut tullinngorpoq, tassanimi Inuit Ataqatigiit annerpaanngormata. Tassa siornatigut naalakkersuisunut ilaasortaasimasoq Asii Chemnitz Narup qinigaarujussuarnermi kingorna borgmesterissatut piukkunnaateqarlualermat. Asii Chemnitz Narup qinersinermi 994-inik qinerneqarluni qinerneqarnerpaavoq.

Kommunimut ippassaq qinersineq partiinut naalakkersuisoqatigiittunut Siumumut Atassummullu kinguariarfiungaatsiarpoq.

Kangia-Kitaata kommunissaani Siumut 9 procenti sinnerlugu kinguariaateqarpoq Avannaatalu kommunissaani 6 procentingajammik kinguariarluni. Taamaallaat Kujataata kommunissaaani Siumut siuariarpoq, Qeqqatalu kommunissaani allanguuteqarpallaarani. Atassut kinguariaateqarneruvoq. Tassami partii kommuninngortussani sisamaasuni tamani kinguariaateqarpoq, Avannaata Kujataatalu kommunissaani kinguariaateqarnerpaalluni.

Qinersinerup inerneri nittartakkatsinni knr.gl-imi takuneqarsinnaapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq