Siumut Inuit Ataqatigiillu naalakkersuisoqatigiinnerisa oqaluttuassartaa

Siumup Inuit Ataqatigiillu siullermik 1984-imi naalakkersuisoqatigiilerput.

USA-miulli Pituffimmi sakkutooqarfimminnik alliliinissamut pilersaarutaannut akerleriinnerat pissutigalugu taamaatippaat. USA-miut Nunatsinniinnerminnut akiliisarnissaat Siumumit piumasarineqarpoq, Inuit Ataqatigiillu sakkutooqarfimmut akerliullutik.

- Taamani sorusunnersuup nillertup ingerlanerani taamaattut aporfissat takkuteriasaarput. Taannalu aallaavigalugu suleqatigerusukkunnaarpaatigut, Inuit Ataqatigiit taamani siulittaasuat, Aqqaluk Lynge taama oqarpoq.

Ukioq ataasiutinnagu naalakkersuisoqatigiikkunnaartut

Ukiorli suli naanngitsoq suleqatigeeqqissinnaalersimapput, naalakkersuisoqatigeeqqilerlutillu.

Nuarsuamili naalarulunnartumik pisoqarfiunera pissutigalugu suleqatigiinnerat unammillernarsimavoq.

USA-miullu Nunatsinniinneraq Siumup iluani aamma assortuussutaasimasoq, Aqqaluk Lynge oqaluttuarpoq.

- Taama akornaminni qalliunnialeraangata taava allat eqqorneqartarput, Aqqaluk Lynge oqarpoq.

Urani partiinit marlunnit taamani aamma assortuussutaasoq aviisit 80-ikkunni aamma allaaserisarpaat.
Uranili naalakkersuisoqatigiinnermik taamaatitsinngitsoq, Aqqaluk Lyngep oqaatigaa.

Naalakkersuisoqatigiilerneralli tassa 1988-imi, qaammatialunnguani atuuteriiginnartoq, taamaatippoq.

Tamatuma kingorna Siumut kisimiilluni naalakkersuisuutitaqarallarpoq.

Atassut naalakkersuisuutitaqaqqaartoq

Inuit Ataqatigiilli 1999-imi naalakkersuisuutitaqaqqilerput, naalakkersuisoqatigiillu taakku qinigaaffiup naanissaata tungaanut atapput.

1995-imili qinersinerup kingorna Siumup Atassut, siullerpaamik naalakkersuisuutitaqalertoq, naalakkersueqatissatut toqqarpaa. Inuit Ataqatigiilli 1999-imi naalakkersuisuutitaqaqqilerput.

Ukiunili tulliuttuni suleqatigiinneq unammillernarsimarpasippoq.

Politikkikkut aalassassimaarfik

2000-kkummi aallartinnerat politikkikkut allanngorarfiusorujussuuvoq. Inuit Ataqatigiit Atassullu paarlakaajaallutik naalakkersuisuutitaqarput, naalakkersuisoqatigiillu ukiuni sisamani sisamariarlutik allanngorlutik.

2005-imili qinersinerup kingorna partiit pingasut, tassa Siumut, Inuit Ataqatigiit Atassullu, siullerpaamik naalakkersuisoqatigiilerput. Raajartassiissutinulli akerleriinneq pissutigalugu Inuit Ataqatigiit 2007-imi naalakkersuisoqataajunnarput, naalakkersuisoqatigiillu marluinnannanngoqqillutik.

Siumut naalakkersuisuutitaqarunnaaqqaartoq

Inuit Ataqatigiilli Kuupik Kleistimit siulittaasuuffigineqarlutik 2009-mi qinersinermi ajugaapput, naalakkersuisoqatigiilersunilu Siumut siullerpaamik peqataanngilaq.

Qinersinerup siuliani politikkikkut mamianartinneqartut arlallit qineqqusaarnerlu sakkortooq tamassumunnga pissutaasut Kuupik Kleistip oqaatigaa.

- Suleqatigiissinnaannginnermut patsisigisarput pingaarnerpaat tassaavoq, inoqatinut isiginnittatsimut tunngassuteqartoq uagut akuersaanngisarput Siumup tungaaninngaanniit nittarsaanneqarmat. Taannalu patsisaalluni partiini allanik suleqateqarpugut, Kuupik Kleist oqarpoq.

Pinngitsuugassaanngitsumik piumasaqaat

Qinersinerulli tulliani Siumut ajugaaqqippoq, Inuit Ataqatigiillu illuatungiliuttunngoqqipput.

Siumut Inuit Ataqatigiinnut pinngitsuugassaanngitsumik piumasaqarsimasoq, Kuupik Kleistip eqqaamavaa. Tamannalu Inuit Ataqatigiit tunngaviusumik akuerisinnaasimanngilaat.

- Eqqaamasara tassaavoq pappiaraq ataatsimik marlunnilluunniit quppernilik Inuit Ataqatigiinnut akuersaaqqullugulu atsioqquneqartoq ataatsimiinnermi saqqummiunneqartoq. Naligiittut isumaqatiginnninniassagutta aallaaviit taama ittut tunngaviusumik akuersaanngilagut, Kuupik Kleist oqarpoq.

Kuupik Kletip siulittaasuunerani Inuit Ataqatigiit politikkiat qeqqata tungaanukariartorpoq. Kuupik Kleist partiimi siulittaasuatut Inatsisartunullu ilaasortatut 2014-imi tunuarpoq. Taamatumalu kingorna partiip politikkia saamiup tungaanukariartoqqippoq nunamullu pingaartitsinerulerluni.

Ukiuni qulingiluani naalakkersuisoqatigiinnginneq

Kleistilu tunuarmat Sara Olsvigip Inuit Ataqatigiit 2014-imi qinersinermi siulersorpai. Tassani Siumut ajugaaqqippoq, Inuit Ataqatigiillu naalakkersuisoqatigiinnut aamma peqataatinneqanngillat.

Tamatumanilu Siumut Inuit Ataqatigiillu naalakkersuisoqatigiinnerat 2007-imi taamaatinneqarmalli ukiut arfineq marluk qaangiutereerput, tamannalu Siumut Inuit Ataqatigiillu naalakkersuisoqatigiinnginneranni sivisunerpaajuvoq.

Tamannali Siumut, Inuit Ataqatigiit Partii Nalerarlu oktobarip 27-ani naalakkersuisoqatigiilermata allanngorpoq.

Suli uran

Ukiunili qulikkuutaani assortuussutigineqarsimasoq suli isumaqatigiinngissutigineqarpoq.

Sulili ukiut qulikkaani akerleriissutigineqartoq isumaqatigiissutigineqanngilaq.

- Naalakkersuisooqatigiinnermut isumaqatigiissummi takuneqarsinnaavoq, naalakkersuisooqatigiinni partiit pingasuusut akornanni partiit marluk uranimik attuinngilluinnaqqissaarnermik isumarput attakkipput. Taannalu naalakkersuisooqatigiinni soorunami ataqqineqassaaq, Inuit Ataqatigiit maanna siulittaasuat Sara Olsvig oqarpoq.