Siumut Folketingimi amerliartorput

Siumup Folketingimi allaffeqarfimmini sulisuni amerlisarpai. Doris Jakobsenip Christiansborgimiinnerata nalaani sulisut politikeri ilanngullugu pingasuupput, maannalu Aleqa Hammondip nalaani allaffeqarfimmi inuit katillutik tallimanngorlutik.

Aleqa Hammond taamak paasissutissiivoq.

Oktobarip aallaqqaataani Siumup allattaanerisimasaa, Kenneth Rasmussen, Folketingimi Aleqa Hammondimut siunnersortinngorpoq, taamaalilluni Hans Jakob Helms ukiorpassuarni Folketingimi sulereerluni ukioq manna soraarninngortoq taaserlugu.

Taassuma saniatigut Miki Jensen, Small Times Giantsimi erinarsortutut ilisarisimaneqarluartoq, allatsitut sulisuuvoq, Aki-Mathilda Høegh-Damilu qanittumi BT-p pinnerneqqusaatitsineranni ilaasoq aamma atorfinitsinneqarluni.

Atorfik ataaseq suli inuttalerneqarsimanngitsoq Siumut allaffeqarfia nalunaarpoq.

Aleqa Hammond naapertorlugu sulisuni tamarmik pingasunik oqaaseqarnissaat piumasarisimavaa.

- Piumasaqaatitut inississimavara isumaqarama kikkut tamaasa attaveqarfigisinnaanissaat pingaaruteqartorujussuusoq, oqarpoq.

Inuit Ataqatigiit Folketingimi allaffeqarfiat ullumikkut tallimanik sulisoqarpoq, folketingimut ilaasortaq Aaja Chemnitz Larsen ilangullugu.