Siumut, Atassut Inuit Ataqatigiillu ajorsassartuupput

oktobarip 08-at 2004 13:57

Inatsisartunut ullumikkut qinersisoqartuuppat partiitoqqat Siumut, Inuit Ataqatigiit Atassullu kinguariassagaluarput. Isumasiuinerulli inernera kinguartussanit upperineqarpallaanngilaq, allaallu isumasiuinermi periuserineqarsimasoq apeqquserlugu.

Siumut Inatsisartuni ilaasortaatitaat ataatsimik ilanngassagaluartut isumasiuinerup takutippaa.

- Kinguariassasugut isumasiuinerit tamarmik takutittarpaat, qinersinissarli nalleraangat allarluinnarmik inerneqartarluni. Qinersinissaq nalleraangat inuit isummaminnik aamma allanngortitsisarput. Taamaattorli aalajangigassat sakkortuut inuit isumaannik allanngortitsisinnaasarmata nalunngilarput, inuilli tamarmik piumasaat malinneq ajornaqaaq. Siumup siulittaasua Hans Enoksen nassuiaavoq.

Hans Enoksen aamma isumaqarpoq, isumasiuinerup inernera eqquutissanngippat pissakinnerusut inuusuttullu suliniarfiginerusariaqassallugit. Inatsisartunut ullumikkut qinersisoqartuuppat Atassut marlunnik ilanngassagaluarput.

- Kingullermik qinersisoqalermat aamma siulittuisoqarpoq, taamanilu ikileriarujussuarnissatsinnut siulittuisoqaraluarluni. Tamarmik eqquutinngillat, taamaattumik apeqqutaalluinnarpoq isumasiuinerit qanoq annertutigisumik toqqammavigineqarsinnaanersut. Atassutip siulittaasua Augusta Salling nassuiaavoq.

Aammali allaffissornerup nunaqarfinnullu attaveqarnerup nukittorsaavigineqaleruttornerat ullumikkut qinersisoqaraluarpat kinguneqarluartitsissagaluartut Atassutip siulittaasuata isumalluarfiginerarpaa.

Inuit Ataqatigiit ullumikkut qinersisoqartuuppat ataatsimik ilanngassagaluarput, siulittaasuat Josef Motzfeldt isumaqarpoq, pingaartumik akit assigiikkunnaarnissaannut tunngasoq qinersisartut nalornisilersimassagaat.

- Akit assigiikkunnaarnissaannut tunngasumut ukiup affaa kingulleq atorsimavarput, nassuiaanissamullu piffissaqarpiarsimanata. Qujanartumillu ullumikkut qinersisoqartussaanngimmat ukiut marluk nassuiaanissamut suli piffissaqarpugut. Josef Motzfeldt oqarpoq.

Kattusseqatigiit isumasiuineq naapertorlugu nikeriassanngikkaluarput ullumikkut qinersisoqartuuppat, Inatsisartunilu ataatsimik ilaasortaatitaqaannassagaluarlutik.