Hermann Berthelsen: Siumup siulittaasuata taarsernissaanut piffissaanngilaq

Siumumit politikerip nuimasup partiip siulittaasussaanik qinersineq Inatsisartunut qinersinermik kinguneqassanngitsoq neriutigigaa, aviisi Sermitsiaq allappoq.
Assi © : Qeqqata Kommunia
Allattoq Karsten Sommer
juulip 21-at 2017 12:56

Kina nunatsinni partiip annersaata siulittaasortaarissaneraa tamatta sapaatip akunnera una paasissavarput.

Siumut nuna tamakkerlugu ataatsimeersuarpat siulersuisunik nutaanik sisamanngorpat juulip 27-ani qinersisoqassaaq. 

Maannamut qinigassanngortissimasut marluupput tassalu Naalakkersuisut siulittaasuat, Kim Kielsen, ilaatigullu nunanut allanut tunngasunut naalakkersuisuusimasoq, Vittus Qujaukitsoq qinerneqarsinnaapput.

Qeqqata Kommuniata borgmestererisimasaa, Hermann Berthelsen isumaqatigiinngitsut isumaqatigiissutigallarsinnaasaattut eqqaaneqarsimagaluarpoq. Sermitsiarli ullumi saqqummersoq naapertorlugu Hermann qinigassanngortinnianngilaq.

- Siumup siulittaasua allanngortariaqanngimmat qinigassanngortinnianngilanga, Hermann Berthelsen aviisimut oqarpoq.

Siulittaasup taarsernera piffissaanngitsukkut qinersisoqarneranik Siumullu immikkoortinneqalerneranik kinguneqarsinnaanera taassuma ernummatigaa.

- Kim Kielsen innuttaasunit tapersersorneqarluarpoq. Qinersisai qiviaannarsinnaavagut. Aningaasaqarnerlu ukiorpassuanngortuni aatsaat taama pitsaatigaaq, Hermann Berthelsen Sermitsiamut erseqqissaavoq.

Berthelsenip Siumumi eqqissisimannginneq partiimik uppititsinermik kinguneqarsinnaanera ernummatigaa.

- Siumumi eqqissisimanissaq tamatta pisariaqartipparput, borgmesteriusimasoq Sermitsiamut oqarpoq.