Siumup oqaseqartartua saassussisoq
Inuussutissarsiutigalugu sinerissap qanittuani aalisartunut akuersissutinik agguaassisimaneq isornartorsiuinermut peqqutaavoq. Siumut isumaqarpoq arriippallaamik ingerlanneqartoq, naalakkersuisorlu Karl Kristian Kruse tamatumunnga pisuutillugu.
- Aalisartunut akornusersuineq tamaanga killeqartariaqartoq, Immanuelsen oqaluttarfimmiit oqarpoq.
Isornartorsiuineq Naalakkersuisut kissaataannut, tassa inuussutissarsiutigalugu sinerissap qanittuani aalisartut amerlingaluttuinnartut ikilisinneqarnissaannut akerliusoq.
Aamma atuaruk Aningaasanut Inatsit naalakkersuisoqatigiinik avissaartuutsitsivoq
Siumup oqaaseqartartuata aamma erseqqissarpaa, partiip kissaatigigaa nunatsinni aalisakkanik suliffissuit nakkutigineqalernissaat.
Tamatumunnga pissutaavoq aalisakkanik suliffissuit sulisussaaruttarnerat, naak suliffissaaleqisut amerlangaluaqisut. Taamaattumik tunisassiorneq pillugu Siumut ataatsimiititaliorusuppoq suliffissuarnik nakkutiginittussanik.
Aamma atuaruk PolarOil: Uliap qanoq akikillitiginissaa naluarput
Immanuelsenip oqaaseqarnerani ammattaaq KNI saassutarineqarpoq. Soorlu siusinnerusukkut erseqqissaavigisimangaa, uuliap akitsuuserneqarnissaa Siumup akuererusunngikkaa.
- Akitsuutit qaffanneqassappata nunami tamarmi soqutigisat aallaaviusariaqartut, KNI- Pilersuisup soqutigisai aallaaviginagit, Jens Immanuelsen oqarpoq.
Uulialli akitsuusernissaa siunnersuutigineqarpoq nunap nunallu karsianut iluaqutissatut, KNI'p soqutigisai aallaaviginagit. Uuliamik akitsuut nunatta karsiata 60 millioner koruuninik isertitsissutigisussaagaluarpaa.
