Siumup Aleqa qineqqusaartinnianngilaa
Siulittaasutut qinigaaqqammersoq Kim Kielsen siuttoralugu Inatsisartunut novembarip 28-ani qinersinissami partiip qinigassanngortitani qineqqusaarutinilu saqqummiuppai.
Ataatsimoorneq – Toqqissisimaneq – Ineriartorneq. Siumut taakkuninnga pingasunik oqaasertaliilluni sassarpoq.
- Oqartoqartarpoq nunatta erfalasua anorimut assoralisimaaleraangami kusanarnerpaasartoq. Tamanna aamma atuuppoq Siumumi. Pissutsit ulluni makkunani assoralisimaarfiugaluartut, taamaattoq sulinitsinni sumunnarnerluta suniarnerlutalu nalunngilluinnarparput.
- Nunarput inuilu pillugit sulivugut, innuttaasullu qitiutillugit Inatsisartuni sulissaagut, partiimiit tusagassiutinut allapput.
Partiilli qineqqusaarnermi ilaatigut aalisarnermi, aatsitassatigut, sanaartornermi Takornariaqarnikkullu isertitassat amerlisarnissaat oqaluuseriniarpaat. Aamma suliffissaaleqisut 2943-it ilaat amerlanerit sulilissapput, sanaartortoqarnerussaaq inuusuttullu ilinniassallutik.
Aamma innaassagissamut, imermut kiassarnermullu akit assigiileqqinnissaat qineqqusaarutaassaaq. Aamma aalisarsinnaanermut akuersissutinik piniarsinnaanermullu uppernarsaatinik agguaasarneq maannakkutut aalisarsinnaanermik uppernarsaatinik nakkutilliisoqarfimmiikkunaarluni kommuninut nuunneqassasoq, isumaqarput.
Taavalu aamma angerlarsimaffimmi ikorteqarnermut akiliuteqartarnerup atorunnaarsinnissaa sulissutiginiarpaat, utoqqalinersiutillu aaqqinniarlugit, utoqqalinersiutillip nammineq isertitai aallaaviulerlutik, aappaata isertitai pinnatik.
Qinigassanngortittut amerlisinnaapput, qinigassanngortittut allattorsimaffiat oktoberrip arfineq aappaani aatsaat tunniunneqartussaammat.