Siumumi avissaartuunnermi siulittaasoq isorineqartoq

Sisimiuni Siumup immikkoortortaqarfiata Siumumi siulittaasoq isornartorsiorpaa, ataatsimoortitsisinnaasumillu siulittaasoqartariaqartoq, kissaatigalugu.
Siumut
maajip 31-at 2017 07:27

Siumut Sisimiut siumut aallartitaasa juulip naanerani ataatsimeersuarnissaannut piareersalereerput. 
Siumumi siulittaasoq qanorittoq piumaneqarnersoq, Siulittaasunngortussap piginnaasai Siumullu ataatsimoorfiunissaa pillugit oqalittoqarpoq. 
Nunatsinni aqutsisumik Siumut siulittaasoqaraluarpoq. Immikkoortortaqarfiillu tapersersuisarnerat naliginnaagaluarpoq tamannali maannakkut taamaappasinngilaq. 

Siumup anersaava

Siumut qangatut anersaaqarluni ingerlasariaqalersoq, Siumut Sisimiuni siulittaasoq, Kaaleeraq Møller Andersen oqarpoq.

- Avissaartuunneq Siumumi naammagilerparput, arlariinngorluni sulinerup killinnissaa kissaatigaarput, Sisimiuni Siumut immikkoortortaqarfiani siulittaasoq, Kaaleeraq Møller Andersen taama oqarpoq. 

AAMMA ATUARUK Vittus Qujaukitsoq Siumut Nuummi siulittaasunngortoq

Naak immikkoortortaqarfiup partiimi ataatsimoortoqarnissaanik kissaatigigaluaraa, Siumut Sisimiut Kim Kielsenimik kingumut isorinnillutik kissaatigaat katersuutitsisinnaasumik siuttoqartariaqartoq.

- Siulittaasoruna Siumup anersaavanik anersaaqarluni ingerlatsisussaasoq, aamma siulittaasuusarsimasut allat qiviaraanni ersarissumik ingerlatsisuusarsimapput, taamaattumik Siumup siumuunera takuteqqittariaqarparput, Sisimiuni Siumut immikkoortortaqarfiani siulittaasoq oqarpoq. 
 

Qujaukitsup suleriaasia taperserneqanngitsoq

Siumut Sisimiuni Siumut aallartitaasa ataatsimeersuarnissaata tungaanut aalajangersimasumik qulequtaqarlutik ataatsimiittarnitik aallartippaat, arfininngormallu ataatsimeersuarnermi Siumumi siulittaasunngortussap qanoq ittuunissaanik eqqartuipput. 

Siumut Sisimiut Kim Kielsenip siulittaasuunera pillugu isornartorsiuisareerpoq. Maannamullu Siumumi siulittaasussarsiornermi Kim Kielsen aamma Vittus Qujaukitsoq siulittaasussarsiornissami sassartuupput.  

Siumut Sisimiulli Qujaukitsoq pissutsimigut sulinerminilu ajornartorsiuteqarsorisartik taperserniarnerlugu toqqaannartumik oqaatiginngilaat. Kaaleeraq Møller Andersenilli 
Vittus Qujaukitsup naalagaaffinnut peqatigiinnut Danmarkip pillugu maalaaruteqarnera innersuussutigaa.
- Imarisaa ajunngilaq, ingerlanneranili tunulequtaqannginnera ajorpoq, Kaaleeraq Møller Andersen oqarpoq.  

 

AAMMA ATUARUK Naalakkersuisut maalaarut utertikkaat

AAMMA ATUARUK Vittus peqateqarani maalaarummik nassiussivoq

Toqqaasoqarnissaanut eqqartuisoqartariaqartoq

- Siulittaasussamik allamik saqqummertoqanngippat kina toqqassanerlutigu taava eqqartoqqissaartariaqassavarput, piumasaqaatitalimmillu suleqataassaagut, una ersarissartariaqarpoq: Siumut ataatsimoorfiusoq uagut atulersikkusupparput aamma kissaatigaarput, Siumut Sisimiuni siulittaasoq, Kaaleeraq Møller Andersen taama oqarpoq.