Siumukkormiut: Piisaartut politikkimit tunuarlik
- Uanga tamannak inissisimagaluaruma, taava qularutiginngiluinnarpara, tunuarsimassagaluarama. Per Berthelsen taama oqarpoq.
Taanna Taama isummerpoq, AG-p allaaserisani arlalinni qulaareraa, ilaatigut Siumukkormiut Jonathan Motzfeldt, Ruth Heilmann partiillu siulittaasua Hans Enoksen, pisortat aningaasaataat atorlugit ilaquttanik ikinngutinillu neriartoqateqartarsimasut, ilaat ukiortaarsiortitsillutik ilaallu angalanernik akiliussillutik.
Taamaaliortarnerit partii ajortisaraa, Per Berthelsen isumaqarpoq, politikerinillu saliisoqarnissaa ujartorlugu. Tassalu Qaqortumiit maanna taperserneqarpoq, inatsisartunut qinigassanngortittut Bitten Høegh-Dam, Christian Isaksen, Aqqa Lund og Otto Juunaraq Kielsen oqarmata, Inatsisartunut ilaasortat nuimasut taakkua tunuartariaqartut.
"Tunngaviusumik isuma aallaavigisarput tassaavoq, Siumup politikkia, imaanngitsoq naalagarsuartut sassartut, maniguussusermik peqanngitsut suliassaminnullu ataqqinninngitsut. Matumani eqqarsaatigaavut, inuit siornatigut ataqqisaasut, inuilli tatiginninnerannik atornerluingaarsimasut. Angusaat qujassutigaavut, maannali utoqqalillutik tunuartariaqalerput."
Qaqortumi Siumumiit ilaatigut taama allapput. Aleqa Hammond-ip qineqqusaarneq aallartiinnartoq siulittaasuni Hans Enoksen unammillerpaa oqarluni, nammineq naalakkersuisut siunniussaat anguniassallugit pisaanerussalluni. Tamatuma kinguninngua Nuummi Siumup siulittasua, Elisabeth Ravn Johansen, sassarpoq, partimi arnat angutillu nalingiinnerunissaaty ujartorlugu.
Partiimi nuimasunik isornartorsiuilluni qineqqusaarnetrmiit tunuaqqisinermik oqaluttoqarnera Siumup Siulittasuata Hans Enoksen-ip paasilluarsinnaavai
- Soorunami ajuusaarnarpoq, taamatut inissittoqartarmat. Immikkoortortaqarfiit inassuteqaataat siulersuisuunerit naqissusertarpaat, Inatssiartunulli ilaasortaareersut qiningassanngortinniarnerlutik namminneq aalajangertarpaat, Hans Enoksen oqarpoq.
- Siumup iluani kikkulluunnit killeqanngitsumik oqalussinnaapput, uangalu misigisimanngilanga pissaaneq aporaassutigineqartoq, Siumup siulittasua Hans Enoksen oqarpoq.
