Siulluttarneq anniarnerinnaanngilaq

Siulluttarneq anniarnerinnaanngilaq, meeqqalli ineriartorneranut aamma sunniuteqartarpoq.
Assi © : Marianne H. Larsen
maajip 27-at 2017 13:44

Nukappiaraq tallimanik ukiulik siutimigut marlunnik ukioqalernerminiilli arfinileriarluni kuuffilertilluni suliaritikkami iluaqutigaa.

- Inungoqqaarneraninngaaniit malugisimavarput sininniartarneri, sinnakittuaraalluni ingammik unnukkut innangagaangami qiangalasarpoq anniarpasilluni qialluni itertarpoq, Inooraq H. Larsenip anaanaa Marianne H. Larsen taama oqarpoq.

Pisunniartalerneranut akornutaavoq

Inooraq siutimigut imerpalasoqarluni inunnguutsiminik siullutuuvoq. 
Siullunnerli anniarnerinnaangilaq. Inoorarmi pisunniartalernermini aamma ajornartorsiorsimavoq, uppeqqajaasarluni. 

- Pisunniaqqaartalermat maluginikuugatsigu aamma balanceminik pisunniarnerminik akornutigigaa soorlu pisukkaangamik tunumininngaanii oqaluunneqarluni tusaasaqarsinnaaneq ajorpoq, Marianne H. Larsen taama oqaluttuarpoq.

AAMMA ATUARUK Fontain vil bekæmpe grønlandsk verdensrekord i ørebetændelse

Siusissukut kuuffiliisaraanni iluaqutaassanersoq ilisimatuussutsikut maanna misissorneqarpoq. 
Dronning Ingridip Napparsimmavissuani siutit nakorsaat naapertorlugu siullullutik nakorsiartut immikkut nalunaarsorneqanngillat. 

Ilisimatuussutsikkut misissuiffigineqarpoq

Ajornartorsiulli angisuujusoq ilisimavaat. Misissuinerilli ingerlanneqartut naammasisimaleriarpata nunatsinni siulluttarnerup sooq taama ajornatorsiutaatiginera paasineqarnissaa neriuutigineqarpoq.
Suliuniummi Siutinik taasami nunatsinni siutikkut siusinnerusukkut kuuffiliisalernissaq iluaqutaassanersoq misissuisoqarpoq. 

Nunatta sinnerani silluttut taama pineqarneq ajortut, Nuummi siulluttut ukiuni kingillerni 15-ini kuuffilertinnissamik neqeroorfigineqartarput. Anaanaasullu Inooqqap kuuffilertittarsimanera iluaqutaasoq oqaluttuaraa.

- Drænia suli talerperleq atagami, taanna ataannarallassooq aamma. Saamerleq katassimariarami massakkut væskeqarunnaarsimavoq siutaata iluani, taammalu inuttaaraalu tamatta ataataalu uangalu nuannaarutigeqaarput neriuutigalugulu taamaaginnassasoq, Marianne H. Larsen taama oqarpoq.