Siulittaasuusimasoq: Demokraatit ataqatigiissapput
- Siulittaasumik qinersineruvoq pingaarutilik, Jens B. Frederiksen oqarpoq.
Taanna 2007-imit ukiut arfineq-marluk Demokraatini siulittaasuuvoq, maannalu politikkimit tunuarsimalluni.
Iluatsinniaranni imaanngilaq pinngitsoorani naalakkersuisuutitaqartut politikkiannik Demokraatit sunniissasut.
- Siulittaasunngortussaq siulersuisullu partiip kattuffianit tamanit tapersersorneqarnissaa naalakkersuisooqataanertut pingaartigaaq, Jens B. Frederiksen oqarpoq.
Aamma atuaruk Demokraatini siulittaasunngorniuuttoqarpoq
Taamaattumik siulittaasunngorniuuttut qinersisoqareerpat eqqisseqatigiissasut siumullu isigilissasut Jens B. Frederiksenip naatsorsuutigaa.
- Qinersineq amerlanerussuteqartunit aalajangerneqassaaq, taamaattumillu ilaasortat tamarmik siulittaasunngortumut tapersersuissasut naatsorsuutigineqartariaqarpoq - aamma qinigaanngitsoortut, Jens B. Frederiksen oqarpoq.
Demokraatit siunissami pissaaneqassapput
Siulittaasunngortussap Demokraatit ataatsimoortissinnaassappagit, siulittaasuusimasup partiip siunissaa qaamasuussasoq ilimagaa.
- Demokraatit sivisuumik suli partiiussasoq avaqqunneqarsinnaanngitsoq, taamaattumillu siunissami pissaaneqassasoq ilimagaara, Jens B. Frederiksen oqarpoq.
Jens B. Frederiksenilli kina siulittaasunngussanersoq eqqoriarusunngilaa.